प्रदेश २ मा उत्साहजनक मतदान, ७३ प्रतिशत मत खस्यो

लहान : तेस्रो चरण स्थानीय तह निर्वाचनअन्तर्गत तराईका आठ जिल्लामा सोमबार उत्साहजनक रूपमा मतदान सम्पन्न भएको छ ।निर्वाचन आयोगले ७३ प्रतिशत मत खसेको जानकारी दिएको छ । सबैभन्दा थोरै सिरहामा ६५ प्रतिशत हाराहारी मत खसेको छ भने सप्तरीमा ७६ प्रतिशत, धनुषामा ७३ प्रतिशत, महोत्तरीमा ७३ प्रतिशत र रौतहटमा ७५ प्रतिशत मत खसेको छ । छिटपुट घटनाबाहेक आठवटै जिल्लामा मतदान शान्तिपूर्वक तथा उत्साहजनक ढंगले सम्पन्न भएको आयोगले जनाएको छ । 

 

दुई नम्बर प्रदेशको एक मात्रै महानगर वीरगन्ज तथा तीन उपमहानगर कलैया, जितपुर सिमरा र जनकपुरमा ७० प्रतिशतभन्दा बढी मत खसेको सम्बन्धित निर्वाचन अधिकृतको कार्यालयले जनाएको छ । जिल्ला निर्वाचन कार्यालय धनुषाका प्रमुख पुष्पा झाका अनुसार आयोग र प्रशासनले सोचेभन्दा बढी शान्तिपूर्वक र उत्साहसाथ मतदान सम्पन्न भएको छ । झाका अनुसार सोमबार अबेरसम्म मतपेटिकाको व्यवस्थापन जारी रहेकाले मंगलबार बिहानबाट मात्रै मतगणना सुरु हुनेछ । सदरमुकामबाहिर कतिपय ठाउँमा अबेर राति नै गणना प्रक्रिया सम्पन्न हुने झाले बताइन् ।

सिरहाको कल्याणपुर नगरपालिकामा राजपा र माओवादी केन्द्रका कार्यकर्ताबीच केहीबेर झडप भयो । धनुषाको लखौरीमा समेत केही तनाव भए पनि मतदान स्थगन भएको थियो तर पछि सुचारु भयो । रौतहटको केही ठाउँमा दिउँसो अवस्था तनावपूर्ण बनेको थियो तर कुनै अप्रिय घटना हुन पाएन । समयमै सशस्त्र प्रहरी पुगेर झडप नियन्त्रणमा लिएको थियो ।

हिलोमा एक घन्टा लाइन लागेर मत खसालेकी सिरहा गोलबजार-४ की अनितादेवी सदाले भनिन्, ‘अब विकासको वर्षा हुन्छ । भ्रष्टाचार अन्त्य हुन्छ । त्यसैले हिलोमा बसेर पनि मतदान गरेको छु ।’ उनीजस्तै अन्य मतदाता पनि यस्तैखाले प्रतिक्रिया दिन्छन् । हरेक मतदाताको चाहना छ, ‘इमानदार नेताले चुनाव जितोस् । विगतमा नेताहरूले आफ्नै प्रतिबद्धता लत्याए । अब यस्तो नहोस् ।’ जनप्रतिनिधविहीन अवस्थामा भ्रष्टाचार बढेको बताउने मतदाताले जनप्रतिनिधि चयन भएपछि भ्रष्टाचार न्यूनीकरण हुने विश्वास गरेका छन् ।

सिरहामा ६५ प्रतिशत मत खसेको मुख्य निर्वाचन अधिकृत अमृतबहादुर बस्नेतले जानकारी दिए । उनले महिला र पुरुषको प्रतिशत भने छुट्याउन पाएका छैनन् । यस्तै, सप्तरीमा पनि ७६.८ प्रतिशत मत खसेको जिल्ला निर्वाचन अधिकारी महेशकुमार ठाकुरले जानकारी दिए । उनका अनुसार १ लाख ३२ हजार ९ सय ३२ महिला, १ लाख २० हजार ५ सय ४९ पुरुष र ९ जना तेस्रोलिंगीले मत दिएका छन् ।

रौतहटमा ७५ प्रतिशतभन्दा बढी मत खसेको जिल्ला निर्वाचन कार्यालयले जनाएको छ । जिल्लाको सबै मतदानस्थलमा शान्तिपूर्ण र मतदाताको उत्साहपूर्ण सहभागितामा मतदान सम्पन्न भएको रौतहटका प्रहरी प्रमुख यज्ञविनोद पोखरेलले जानकारी दिए । प्रहरी प्रमुख पोखरेलले भने, ‘मतदान सकिएलगत्तै गणनास्थलमा मतपेटिका ल्याउने काम भइरहेको छ ।’

जिल्ला निर्वाचन कार्यालय रौतहटका प्रमुख राजन श्रीवास्तवले ७५ प्रतिशतभन्दा बढी मत खसेको जानकारी दिए । जिल्लाका १६ नगरपालिका र २ गाउँपालिकाको मतपेटिका मध्यरातसम्म गणनास्थल आइपुग्ने बताइएको छ ।

सदरमुकाम गौरको मत जिल्ला विकास समितिको हलमा गणना हुनेछ भने चन्द्रपुर नगरको जनज्योति क्याम्पस र गरुडा नगरको नमुना मावि गरुडामा हुनेछ । अन्य नगर तथा गाउँपालिकाको गणना पायक पर्ने उपयुक्त स्थानमा गणना हुने निर्वाचन कार्यालयले जनाएको छ ।