आन्दोलनको ‘सेन्टीमेन्ट’ले साख जोगाउँदै राजपा

जनकपुरधाम : स्थानीय तहको दुई चरणको निर्वाचनमा सहभागि नभई तेस्रो चरणमा आठ जिल्लाको चुनावी प्रतिस्पर्धामा उत्रिएको राष्ट्रिय जनता पार्टी नेपाल, मधेस आन्दोलनको ‘सेन्टीमेन्ट’ले जोगिदैं गएको छ । संविधानमा मधेसी जनताको अधिकारलाई सुनिश्चित गराउन संशोधनको मांग सहित दुई चरणको निर्वाचनमा भाग नलिएको राजपा संशोधन विधेयक संसदमा पेश भएपछि चुनावको समर्थनमा आएको हो ।

 

मधेसलाई एजेण्डा बनाएर अघि बढेको राजपालाई सोही मधेसी जनताको ‘सेन्टीमेन्ट’ले अहिले प्रमुख नगरहरुमा मुख्य प्रतिस्पर्धी बनाएको छ । आठ जिल्लामध्ये एकमात्र महानगरपालिका विरगञ्जमा मेयर पदमा नेपाली कांग्रेस भन्दा अगाडि रहेको राजपाले जनकपुर उपमहानगरपालिकामा तेब्बर मतले कांग्रेसलाई पछि पारेको छ । 

त्यसैगरी गौर नगरपालिका, जलेश्वर नगरपालिका लगायत प्रदेश नम्बर २ को प्रमुख शहरहरुमा राजपाको बर्चस्व सहजै कायम हुने प्रारम्भिक मतगणनाले देखिएको छ । निर्वाचन आयोगबाट सार्वजनिक गरिएको यस प्रदेशको १ सय ३६ स्थानीय तह मध्ये पहिलो नतिजामा राजपाले अग्रता देखाएको छ ।

धनुषा जिल्लाको हंसपुर नगरपालिकामा राजपाबाट मेयर पदमा युवा उम्मेदवार रामज्ञान मण्डल विजयी भएका छन् भने मधेस आन्दोलनमा निकै सक्रिय रेणु झा उपमेयर पदमा विजयी भएकी छिन् । मण्डल ३३२० मत ल्याई मेयरका विजेता भएका हुन् भने झाले उपमेयरमा ३२७६ मत ल्याएर जित हात पारेकी छिन् ।

२०४६ पछि भएका सबै निर्वाचनमा कांग्रेसको गढ रहेको हसंपुर नगरपालिकामा राजपा जित्नु मधेस आन्दोलनकै उपलब्धी रहेको सर्वसाधारणहरु बताउंछन् । २०४७ सालमा भएको संसदीय निर्वाचनमा कांग्रेसका आनन्द ढुंगानाले सो क्षेत्रबाट जित हात पारेका थिए । २०४९ सालमा भएको स्थानीय तहको निर्वाचनमा सो क्षेत्रबाट कांग्रेस नेता काशिकान्त झा गाविस प्रमुखमा निर्वाचित भए भने २०५४ सालमा भएको स्थानीय तह निर्वाचनमा कांग्रेस नेता काशिकान्त झा नै विजयी भए ।

२०५१ र २०५६ को संसदीय निर्वाचनमा कांग्रेसका ढुंगानाले नै सो क्षेत्रलाई प्रतिनिधित्व गरे भने पहिलो र दोस्रो संविधान सभाको निर्वाचनमा कांग्रेसका रामकृष्ण यादवले सो क्षेत्रबाट विजय हासिल गरेका थिए । कांग्रेसको राम्रो पकड भएको हंसपुर क्षेत्रलाई राजपाले २० वर्षपछि जितेको हो ।

बुधबार सांझ सम्मको मतपरिणाम अनुसार राजपाले १ नगरपालिका सहित ८ जिल्लाका २४ वटा वाडमा जित हासिल गरेको छ । प्रदेश नम्बर २ मा समग्र रुपमा हाल कांग्रेसले सबै भन्दा बढि स्थानीय तहमा अग्रता लिएको निर्वाचन आयोगले जनाएको छ ।