धनुषाका १८ मध्ये ७ तहको नतिजा सार्वजनिक
जनकपुरधाम : धनुषाको क्षिरेश्वरनाथ नगरपालिकामा मेयर र उपमेयरमा नेपाली काँग्रेसका उम्मेदवार विजयी भएका छन् । क्षिरेश्वरनाथ नगरपालिकाको मेयरमा काँग्रेसका योगेन्द्र पञ्जियार र उपमेयरमा रचना श्रेष्ठ विजयी भएका छन् । पञ्जियारले ५८९९ मत ल्याई विजय प्राप्त गरेका छन् भने उनका प्रतिद्धन्दी संघिय समाजवादी फोरमका सुकदेव यादवले ३५०० सय मत प्राप्त गरेका छन् । उप प्रमुखमा काँग्रेसकी श्रेष्ठले ५६९८ मत प्राप्त गरेकी छिन् ।
यस विजयका साथै धनुषाको १८ वटा स्थानीय तहमध्ये ७ वटाको परिणाम सार्वजनिक हुँदा काँग्रेस ४ तहमा विजयी भएको छ । जिल्लाको धनौजी गाउँपालिकामा काँग्रेसका बद्रीनारायण सिंह २४२० मत ल्याई प्रमुखमा विजयी भएका छन् भने । उपाध्यक्षमा कांग्रेसकै रामवती देवी मण्डल २३२७ मत ल्याएर निर्वाचित भएकी छिन् । उनका प्रतिस्पर्धी राजपा नेपालका जिवेन्द्र झा र उपाध्यक्षमा प्रतिस्पर्धी निर्मलादेवी मण्डल रहेका थिए ।
धनुषाको जनकनन्दनी गाउँपालिकामा पनि कांग्रेस निर्वाचित भएको छ । कांग्रेसका अब्दुलवारिक शेष २ हजार ७ सय १७ मत ल्याएर गाउँपालिकाको अध्यक्षमा विजयी भएका छन् भने उनका निकटतम प्रतिद्धन्दी संघीय समाजवादी फोरमका विपिनदेव यादवले २१८० मत प्राप्त गरेका छन् । उपाध्यक्षमा कांग्रेसकी भारती कार्की ३०५१ म्त ल्याई विजयी भएकी छिन् ।
त्यस्तै औरही गाउँपालिकामा नेपाली कांग्रेसका ब्रह्मदेव यादव विजयी भएका छन् । उनले २५६९ मत पाएका हुन् भने उनका निकटतम प्रतिद्धन्दी नेकपा एमालेका उमाशंकर प्रसाद साह १९०४ मत पाएर पराजित भएका हुन् ।
यता, नेपाली कांग्रेसका वरिष्ठ नेता विमलेन्द्र निधिको प्रभाव क्षेत्र रहेको धनुषाको मुखियापट्टी मुसहरनीया गाउँपालिकामा एमालेले जित हात पारेको छ । नेपालकै सबैभन्दा तल्लो क्षेत्रमा पर्ने यस गाउँपालिकामा स्थानीय तहको निर्वाचनमा एमालेका उम्मेदवार अध्यक्ष र उपाध्यक्षमा विजयी भएका छन् ।
सो गाउँपालिकाको अध्यक्ष पदमा एमालेका मनोजकुमार यादव ३५४० मत ल्याई विजयी भएका छन् भने उपाध्यक्षमा एमालेकै मिरादेवी महतो ३५७० मत ल्याई जित हात पारेकी छिन् । यादवका निकटतम प्रतिद्धन्दी काँग्रेसका रामबाबु यादवको १९९२ मत आएको थियो । सो गाउँपालिकाको वडाध्यक्षहरुमा १,२,३,५ र ६ मा एमालेले जित हात पारेको छ भने ४ मा स्वतन्त्र उम्मेदवार उदयचन्द्र झा विजयी भएका छन् ।
त्यसैगरी जिल्लाको बटेश्वर गाउँपालिकामा पनि एमाले विजयी भएको छ । एमालेका डम्बर बहादुर राउत २३७७ मत ल्याई विजयी भएका छन् भने उनका निकटतम प्रतिद्धन्द्धी काँग्रेसका रामअशिष महतो २३०३ मत ल्याएका थिए । उपाध्यक्षमा एमालेकै प्रमिला देवी २२९० मत ल्याई जियी भएकी छिन् । जिल्लाको हंशपुर नगरपालिकामा राजपा मेयर र उपमेयरमा विजयी भएको हो ।
प्रतिक्रिया दिनुहोस !
