स्विस टेनिस सुन्दरी हिंगिजको सन्न्यास

बासेल : स्विस टेनिस सुन्दरी मार्टिना हिंगिजले यसै साता हुने डब्लूटीए टेनिसको फाइनलपछि सक्रिय खेलजीवनबाट सन्न्यास लिने घोषणा गरेकी छन् । स्लोभाकियामा जन्मिएकी ३७ वर्षीया हिंगिजले लामो समयदेखि डबल्स स्पर्धामात्र खेल्दै आएकी छन् । डबल्स स्पर्धामा उनी हाल पहिलो वरीयतामा आसीन छन् । एकल स्पर्धामा पनि आफ्नो समयकी प्रभावशाली खेलाडी हिंगिजले पाँचवटक ग्रान्डस्लाम एकल उपाधि पनि जितेकी छन् ।

हिंगिजले यसअघि दुईपटक सक्रिय खेलजीवनबाट सन्न्यास घोषणा गरेकी थिइन् । पहिलोपटक उनले सन् २००३ मा केवल २२ वर्षको उमेरमा सन्न्यास लिएकी थिइन् । केही समयपछि पुनः टेनिस कोर्टमा फर्किएकी हिंगिजले सन् २००७ मा पनि सन्न्यास घोषणा गरेकी थिइन् । पछिल्लो समय डबल्स स्पर्धामा बढी सक्रिय देखिएकी हिंगिजले यो वर्ष दुईवटा ग्रान्डस्लाम प्रतियोगिताको मिक्स डबल्सतर्फको उपाधि जितेकी छन् ।

विम्बल्डन र यूएस ओपनमा मिक्स डबल्सतर्फको उपाधि चुमेपछि उनी पुनः पहिलो वरीयतामा फर्किएकी हुन् । ‘यसपटक मैले सन्न्यास घोषणा गरेको पक्का हो, अब प्रतिस्पर्धात्मक टेनिस खेल्न म कोर्टमा फर्किने छैन’, आफ्नो सन्न्यास घोषणा गर्दै हिंगिजले भनेकी छन् । ‘यो वर्ष मैले महत्वपूर्ण प्रतियोगिताको उपाधि पनि जितेकी छु, मेरो विचारमा सन्न्यास लिने उपयुक्त अवसर पनि यही हो’, उनी भन्छिन् ।

सन् १९९६ मा विम्बल्डनमा महिला डबल्सतर्फको उपाधि जित्दा हिंगिज केवल १५ वर्षको थिइन् । तत्कालीन चेकोस्लोभाकियाकी हेलेना सुकोभासँग मिलेर महिला डबल्सतर्फको उपाधि जितेपछि हिंगिज ग्रान्डस्लाम प्रतियोगितामा उपाधि हात पार्ने सबैभन्दा कम उमेरकी खेलाडी पनि बनेकी थिइन् । सन् १९९७ मा उनी केवल १६ वर्षको उमेरमा डब्लूटीए वरीयताको पहिलो स्थानमा उक्लिएकी थिइन् । सोही वर्ष उनले अस्ट्रेलियन ओपनका रूपमा पहिलोपटक ग्रान्डस्लाम प्रतियोगिताको महिला एकलतर्फको उपाधि जितेकी थिइन् ।

हिंगिजले सन् १९९७ देखि सन् १९९९ सम्म लगातार तीनवटा अस्ट्रेलियन ओपनको एकल उपाधि जितेकी थिइन् भने सन् १९९७ मै उनले विम्बल्डन र यूएस ओपनको एकल उपाधि पनि चुमेकी थिइन् । सोही वर्ष अर्को ग्रान्डस्लाम प्रतियोगिता फ्रेन्च ओपनको फाइनलमा पुगेर पनि उनी उपाधिबाट बिमुख भएकी थिइन् । उनले हालसम्म फ्रेन्च ओपनमा भने एकल उपाधि जित्न सकेकी छैनन् ।