पुरुषमा आर्मी र महिलामा एपीएफ पहिलो
पोखरा : पोखराको फेवाताल किनारमा शनिबार भएको सातौं राष्ट्रिय ट्रायथलन च्याम्पियनसिपमा पुरुषतर्फ त्रिभुवन आर्मी क्लब र महिलातर्फ एपीएफ क्लबले पहिलो स्थान हात पारेका छन् । नेपाल ट्रायथलन संघको आयोजनामा भएको प्रतियोगिताको पुरुष ट्रायथलनतर्फ आर्मीका वसन्त थारू पहिलो भए । थारूले सात सय ५० मिटर पौडी, २० किलोमिटर साइक्लिङ र पाँच किलोमिटर रन सम्मिलित दूरीमा पहिलो स्थान हात पारेका हुन् । थारूले निर्धारित दूरी एक घन्टा ६ मिनेट १९ सेकेन्डमा पूरा गरेका थिए ।
दीपेश चौधरीले एक घन्टा सात मिनेट ५० सेकेन्ड तथा रुद्र कटुवालले एक घन्टा नौ मिनेट १५ सेकेन्डमा निर्धारित दूरी पूरा गर्दै क्रमशः दोस्रो र तेस्रो स्थान हात पारे । दोस्रो र तेस्रो स्थान हात पार्ने दुवै खेलाडी आर्मीकै हुन् ।
महिलातर्फ एपीएफ क्लबकी सोनी गुरुङले स्वर्ण जितिन् । उनले एक घन्टा २२ मिनेट २४ सेकेन्डमा निर्धारित दूरी पूरा गरेकी थिइन् । आर्मीकी यमकुमारी भुजेल एक घन्टा २६ मिनेट ५५ सेकेन्डका साथ दोस्रो भइन् ।
यसैगरी द्वाथलनतर्फ महिलामा प्यूठानकी हुमी बुढामगरले पहिलो स्थान हात पारिन् । उनले निर्धारीत दूरी एक घन्टा १० मिनेट ५५ सेकेन्डमा पूरा गरिन् । यस्तै आर्मीकी मञ्जु खड्का दोस्रो र झापाकी शान्तिकला राई तेस्रो भइन् । पुरुषतर्फ आर्मीका मानबहादुर थापाले निर्धारित दूरी ५७ मिनेट ३६ सेकेन्डमा पूरा गर्दै पहिलो स्थान हात पारे । किरण मल्ल दोस्रो र लक्ष्मण मल्ल तेस्रो बने । दुवै खेलाडी एपीएफका हुन् ।