जहाँबाट वाम गठबन्धन सुरु भएको थियो
पोखरा : स्थानीय तहमा कांग्रेस र माओवादीले गठबन्धन निर्वाचन लड्दा बिरलै ठाउँमा मात्रै माओवादी र एमालेबीच तालमेल भएको थियो । त्यही दुर्लभ तालमेल भएको जिल्ला लमजुङ थियो । तालमेलकै कारण ८ मध्ये ६ वटा स्थानीय तहमा गठबन्धनले जित हाँसिल गर्यो । संयोग ती दुई पार्टीले यसपालीको प्रतिनिधिसभा र प्रदेशसभा निर्वाचनमा देशैभरि गठबन्धन गरे । फलत प्रतिनिधिसभा सदस्यका लागि एउटा र प्रदेशका २ वटा निर्वाचन क्षेत्र भएको लमजुङमा वाम गठबन्धनले सबै तीनै सिटमा जित हाँसिल गरेको छ ।
‘२०६४ सालअघि लमजुङमा कहिल्यै कम्युनिस्टले जित्न सकेनौं’, प्रदेशसभा सदस्य निर्वाचित एमाले लमजुङ अध्यक्ष धनन्जय दवाडीले अन्नपूर्णसँग भने, ‘देशमै सबैभन्दा पहिला वामगठबन्धनको सुरुवात हामीले गर्यौं र नतिजा हाम्रो पक्षमा आउन सक्यो ।’ दवाडीले प्रदेशसभा १ बाट कांग्रेसका गर्जबहादुर गुरुङलाई पराजित गरेका छन् ।
अर्को प्रदेश सभाबाट कांग्रेसका कृष्णप्रसाद कोइरालालाई हराउँदै एमाले सचिव पृथ्वीसुब्बा गुरुङ विजयी बनेका छन् । प्रदेश सभा १ मा दवाडीले २० हजार २ सय ६५ मत ल्याउँदा गर्जबहादुरको मत १३ हजार ८ सय ५३ मात्रै आयो । अर्काे प्रदेशसभा निर्वाचन क्षेत्रमा पृथ्वीसुब्बाले २३ हजार ८८ मत ल्याए भने उनका प्रतिस्पर्धी कोइरालाको पक्षमा १५ हजार १ सय २२ मत आयो । पृथ्वीसुब्बा र कृष्णप्रसादबीच ७ हजार ९ सय ८६को अन्तर परेको छ ।
प्रतिनिधि सभामा माओवादी केन्द्रका नेता देवप्रसाद गुरुङले कांग्रेसका नेता दिलप्रसाद घर्तीलाई ८ हजार ४ सय १ मतान्तरले पराजित गरे । देवप्रसादको ३९ हजार ४ सय ६८ मत आउँदा घर्तीले ३१ हजार ६७ मात्रै ल्याए । देव गुरुङ २०६४ को चुनावमा कास्की १ र मनाङबाट विजयी भएका थिए । त्यो बेला उनले कास्की छाडेका थिए । यसपाली पनि कास्कीबाट उठ्ने मनसाय राखेका उनलाई गठबन्धनले गृहजिल्ला नै पठाएको हो ।
प्रदेश नम्बर ४ को मुख्यमन्त्रीको आकांक्षी भएरै प्रदेश सभामा निर्वाचन लडेका एमाले संगठन विभाग प्रमुख पृथ्वीसुब्बा गुरुङ राजनीतिमा प्रवेश गरेयता उठेका ६ वटा चुनाव मध्ये यसपालीको जित दोस्रो हो । उनले २०६४ मा जीवनमै पहिलोपटक चुनाव जितेका थिए । तर २०७० मा भने उनले कांग्रेस उम्मेदवार चन्द्रबहादुर कुँवरसँग पराजय व्यहोरे ।
०६४ मा गुरुङले कांग्रेस उम्मेदवार दिलबहादुर घर्तीलाई ५ हजार ८ सय ८४ मतले पछि पार्दै जित हाँसिल गरेका थिए । ०७० मा भने कांग्रेसका चन्द्रबहादुर कुँवरसँग ६ सय ७३ मतले मात्रै पराजित भएका थिए । यसअघि लमजुङमा २ निर्वाचन क्षेत्र थिए । २०६४ मा एमालेका पृथ्वीसुब्बा र माओवादीका बुद्धिराम गुरुङले जितेका थिए । २०७० मा भने एमालेका जमिन्द्रमान घलेले र कांग्रेसका चन्द्रबहादुर कुँवरले १÷१ सिट जितेका हुन् ।
लमजुङमा स्थानीय चुनावमा मध्य नेपाल नगरपालिका र दूधपोखरी गाउँपालिका बाहेकमा एमालेले प्रमुख जितेको थियो । क्होंलासोथर, दोर्दी, मस्र्याङ्दी गाउँपालिका र बेसीसहर, सुन्दरबजार र राइनास नगरपालिकामा एमाले माओवादीले जितेका थिए ।
प्रतिक्रिया दिनुहोस !
