दुई मोटरसाइकल र पिकअप जुध्दा एकको मृत्यु, दुई घाइते
बागलुङ : बागलुङको बडिगाड गाउँपालिका २ मा बुधवार दुई वटा मोटरसाइकल एक साथ दुर्घटनामा परेका छन् । जसमा एक युवकको ज्यान गएको छ भने दुई जना घाइते भएका छन् ।
खर्वाङबाट ग्वालीचौर तर्फ जाँदै गरेको ना ४ च ३६६७ नम्वरको पिकअप र विपरित दिसावाट आउँदै गरेका ध १ प ३२४६ र बा ५५ प ८०५० नम्वरका मोटरसाईकल बडिगाड गाउँपालिका २ काँडेरुख नजिक आपसमा ठोकिँदा दुर्घटना भएको हो ।
मृत्युु हुनेमा ढोरपाटन नगरपालिका १ का ३६ बर्षिय खगेन्द्र विसी रहेका छन् । उनलाई हेलिकप्टर मार्फत गण्डकी अस्पताल पोखरा लैजादै गर्दा बाटैमा मृत्यु भएको इलाका प्रहरी कार्यालय बुर्तिबाङले जनाएको छ ।
घाईते सोही स्थानका २७ वर्षिय सुरेन्द्र वोहोराको गण्डकी अस्पताल पोखरामा उपचार भईरहेको छ भने अर्का २६ वर्षिय भरत विसिको वामी गुल्मीको निजी मेडिकलमा उपचार भईरहेको छ । बुर्तिवाङवाट बुटवलका लागि हिँडेका मोटरसाईकलले यात्रुवाहक बसलाई ओभरटेक गर्ने क्रममा विपरित दिसाबाट आइरहेको पिकअपसँग ठोक्किएको प्रत्यक्षदर्शीले बताएका छन् ।
पिकअप चालक खर्वाङ प्रहरीको नियन्त्रणमा रहेको प्रहरी नायव निरीक्षक लालवहादुर चौधरीले बताए । घटनाको थप अनुसन्धान भैरहेको समेत प्रहरीले जनाएको छ ।