राष्ट्रियसभा सदस्य निर्वाचनको लागि प्रदेश २ मा उम्मेदवारी दर्ता हुँदै
जनकपुरधाम : राष्ट्रियसभा सदस्य निर्वाचनको लागि प्रदेश नम्बर २ मा उम्मेदवारी दर्ता गराउने क्रम जारी रहेको छ । उम्मेदवारी दर्ताको समय बिहान दश बजेदेखि राखिए पनि दलहरु दिउँसो एक बजेपछि मात्रै उम्मेदवारी दर्ता गराउन आएका हुन् ।
नेपाली कांग्रेसको तर्फबाट खुल्लामा जितेन्द्र देव र महिला तर्फ मुक्ता यादवले उम्मेदवारी दर्ता गराएका छन् । त्यसैगरी राजपाको तर्फबाट वृषेशचन्द्र लाल र रमेश प्रसाद यादवले उम्मेदवारी गराएका छन् ।
अन्य उम्मेदवारले भने फारम दर्ता गराइ नसकेको सहायक मुख्य निर्वाचन अधिकृत राधाकृष्ण झाले बताए । संघिय समाजवादी फोरमको तर्फबाट रामपृत पासवान र महिलातर्फ प्रमिला यादवले उम्मेदवारी दिने तयारी छ । वाम गठबन्धनबाट महिलामा शशिकला दहाल र खुल्लातर्फ एमालेका सुमन प्याकुरेलले उम्मेदवारी दिने चर्चा छ ।
राष्ट्रिय सभा सदस्यको लागि प्रदेश २ अन्र्तगत आठ जिल्लाका प्रदेशसभा सदस्यसहित १ महानगर, ३ उपमहानगर, ७३ नगरपालिकाका मेयर, उपमेयर र ५१ गाउँपालिकाका अध्यक्ष तथा उपाध्यक्षले मतदान गर्नेछन् । २ नम्बर प्रदेशमा राष्ट्रियसभा निर्वाचनका लागि ३ सय ७९ जना मतदाता छन् ।
माघ २४ गतेको निर्वाचनमा २ नम्बर प्रदेशबाट ८ जना सदस्य राष्ट्रियसभामा निर्वाचित हुने छन् । जसमध्ये ३ जना खुल्ला, ३ जना महिला, १ जना अल्पसंख्यक र १ अपांगता भएका सदस्यमा चुनिने छन् ।