इस्लामाबाद: केही दिनयता सामाजिक सञ्जालमा एक पत्रकार हाँसोको पात्र बनिरहेका छन् । एकजना पाकिस्तानी पत्रकारले आफ्नै बिहेलाई 'ब्रेकिङ समाचार' सहित टेलिभिजनमा लाइभ गरेपछि उनी हाँसोका पात्र बनिरहेका हुन् ।
आफू कार्यरत च्यानलमा आफ्नै बिहेको समाचारलाई कुनै ठुलो घटना भएकै शैली यी पत्रकारले टेलिभिजनमा लाइभ प्रसारण गरेका थिए ।
यो घटना पाकिस्तानी सहर फैसलाबादमा भएको हो । जहाँ सी ४१ टिभी च्यानलका संवाददाता हनन बुखारी माइक लिएरै आफ्नो बिहेमा जन्तीसहित बेुहलीको घर पुगे । सामाजिक सञ्जालमा यो भिडियो अहिले भाइरल भइरहेको छ।
यो भिडियोमा ती पत्रकार दुलाहाको भेषमा छन् । उनी दुलाहाको भेषमै आफ्ना माता पिता, नवदुली पत्नी र सासूको अन्तरवार्ता पनि लिइरहेका छन् ।
यी पत्रकारले बेहुलाको भेषमा सजिएर हातमा टेलिभिजनको माइक समातेका थिए । माइक हातमा लिएर क्यामेरा सामू उभिएका यी पत्रकारले तत्कालै टेलिभिजनमा लाइभ गर्न थाले ।
'आज म आफ्नै बिहेमा उपस्थित भएको छु । जहाँ अहिले उभिएको छु, वहाँ मेरो बिहे भइरहेको छ', उनी भन्दै जान्छन्, 'यो मेरो लागि, मेरी पत्नी र दुवै परिवारका सदस्यका लागि एकदमै खुशीको कुरा हो ।
hilarious!! City41 reporter covering his own wedding ceremony. #PakistaniMedia pic.twitter.com/FC8PYNRD0v
— Amar Guriro (@amarguriro) February 4, 2018
उनी त्यतिमै रोकिनेवाला थिएनन् । 'मैले प्रेम विवाह गर्दैछु । र यस लभ म्यारिजबाट मेरी पत्नी धेरै खुशी छिन् ।' त्यसपछि उनले सुरु गरे आफ्ना परिवारको सदस्यको अन्तर्वार्ता लिन । उनले आफ्नी नवदुलही, आफ्ना बाबु आमा र आफ्ना सासु र ससुराको पनि अन्तरवार्ता लिन सफल भए ।
भिडियोमा बेहुला पत्रकार आफ्नी नवदुलहीलाई सोध्छन्, 'आज तपाईँलाई मसँग बिहे गरेर कस्तो लागिरहेको छ ?' यति मात्रै होइन उनले सासूलाई समेत प्रश्न सोध्न भ्याएका छन् । सासूसँग प्रश्न गर्दै उनले भने, 'जी सासू आमा, तपाईँलाई भने कस्तो लागिरहेको छ ?'
यो भिडियो भाइरल भइसकेपछि माइक्रो ब्लगिङ सामाजिक सञ्जाल ट्विटरमा फरक फरक प्रतिक्रिया आइरहेका छन् । जसमा मानिसले यी पत्रकारको तिखो आलोचना गरिरहेका छन् । कसैले पाकिस्तानी सञ्चारमाध्यमको खिल्ली पनि उडाइरहेका छन् ।
प्रतिक्रिया दिनुहोस !
