पार्टी एकता टुंग्याउन वाम प्रवासीको आग्रह
नयाँ दिल्लीः नेपालमा स्थिर सरकार र अािर्थक विकासका लागि वाम गठबन्धनको एकीकरण टुंग्याउन भारतमा सक्रिय जनवर्गीय संगठनले आग्रह गरेका छन् ।
पार्टी एकता निष्कर्षमा नपुगेको अवस्थामा एमाले निकट प्रवासी नेपाली संघ भारत र माओवादी केन्द्र निकट अखित भारत नेपाली एकता मञ्चले पार्टी एकता कुनै पनि हालतमा बिथोलिन नहुने आह्वान गरेका हुन् ।
भारतको हरियाणा राज्यस्थित फरिदावादमा आयोजित एक कार्यक्रममा वाम गठबन्धनलाई प्रदेश सभा तथा प्रतिनिधिसभाको निर्वाचनामा जनताले दिएको समर्थनको कदर गर्दै पार्टी एकता सफल बनाउन दुवै पार्टीका अध्यक्ष केपी ओली र पुष्पकमल दाहाल प्रचण्डलाई आग्रह गरेका हुन् ।
मुलुकमा स्थायी सरकारको आवश्यकता औल्याउँदै प्रवासी नेपाली संघ भारतका अध्यक्ष लोकनाथ भण्डारीले अन्नपूर्णसँग भने, ‘वाम गठबन्धनले पाएको जनतमत पनि त्यसैका लागि हो । अब पार्टी एकता टुंग्याउनुपर्छ । ’
सबै कम्युनिस्ट पार्टी मिल्ने बेला आएको भन्दै भण्डारीले नयाँ शक्ति पार्टीका संयोजक डा. बाबुरामा भटराई, मोहन वैद्य, नेत्रविक्रम चन्द, चित्रबहादुर केसी लगायत नेतासमेत वाम गठबन्धमा सहभागी हुनुपर्ने उनले बताए ।
माओवादीका केन्द्रीय सचिवालय सदस्य लक्ष्मण पन्तले पार्टी एकताबाट पछि फर्किने छुट नरहेको बताए । उनले भने, ‘समृद्ध नेपाल बनाउन प्रवासी नेपालीको पनि चाहना रहेको छ । त्यसका लागि पार्टी एकता हुनुपर्छ ।’
पार्टी एकीकरणलाई विदेशी शक्तिले भन्दैमा तुहाउन नहुनेमा दुवै पार्टीका अध्यक्ष सचेत हुनुपर्ने माओवादी निकट मञ्चका केन्द्रीय सचिव आरबी खडकाले बताए ।
२३ औं जनयुद्ध दिवस, वाम गठबन्धको विजयोत्सव तथा पार्टी एकीकरणको स्वागतका लागि फरिदावादमा भएको कार्यक्रममा नयाँ दिल्ली तथा एनसिआर क्षेत्रका पार्टी सदस्य सहभागी थिए ।
प्रतिक्रिया दिनुहोस !
