प्रदेश २ को सभामुखमा सरोजकुमार निर्विरोध
जनकपुरधामः प्रदेश नम्बर २ को सभामुखमा राष्ट्रिय जनता पार्टीका सरोज कुमार यादव निर्विरोध निर्वाचित हुने भएका छन् । सभामुखको उम्मेदवारीका लागि मंगलबार यादवले मात्र मनोनयन दर्ता गराएको हुनाले उनी निर्विरोध निर्वाचित हुने निश्चित भएको छ ।
प्रदेशसभा सचिवालयले सभामुखको मनोनय दर्ताका लागि मंगलबार विहान १० बजेदेखि दिउँसो २ बजेसम्मको समय निर्धारण गरेको थियो ।
यस अवधिमा यादवको मात्रै प्रस्ताव दर्ता भएको प्रदेशसभा सचिवालयका सचिव वंशीराज पौडेलले जानकारी दिएका छन् । यादवका प्रस्तावकमा राजपाका प्रदेशसभा सदस्य जितेन्द्र सोनल र समर्थकमा संघीय समाजवादी फोरमका संसदीय दलका नेता लालबाबु राउत रहेका छन् ।
सभामुखमा यादवको मात्रै उम्मेदवारी दर्ता भएपनि बुधबार बस्ने प्रदेशसभाको बैठकबाट मात्र उनि निर्वाचित भएको औपचारिक घोषणा गरिने छ ।
प्रदेश नम्बर २ मा गठबन्धनको सरकार बनाउन गइरहेको संघीय समाजवादी फोरम र राजपा नेपालबीच मुख्यमन्त्री फोरम र सभामुख राजपालाई दिने सहमति भएको हो । यस सहमति अनुसार राजपाले सभामुखमा यादवलाई प्रस्तावित गरेको हो ।
बुधबारको प्रदेशसभाको बैठकमा सभामुखकलाई निर्वाचित गर्ने तथा उपसभामुखको निर्वाचनको मिति घोषणा गर्ने कार्यसूची रहेको छ ।
प्रदेश २ मा २९ सीटमा जितेको फोरम तथा राजपाको २५ वटा सीट भएको कारण सहज बहुमत रहेको बुझ्दै अन्य दलले सभामुखमा उम्मेदवारी दिएका छैनन् । पूर्व स्वास्थ्य राज्यमन्त्री समेत रहेका यादव बारा जिल्लाबाट प्रदेशसभा सदस्यमा निर्वाचित भएका छन् ।
प्रतिक्रिया दिनुहोस !
