सूर्यविनायक बन्यो च्याम्पियन
भक्तपुर : सूर्यविनायक नगरपालिकाले मंगलबार सम्पन्न अन्तरनगर मेयर कप पुरुष भलिबल प्रतियोगिताको उपाधि जितेको छ । भक्तपुर नगरपालिकाद्वारा आयोजित प्रतियोगिताको फाइनलमा कैलालीको गोदावरी नपालाई ३–१ सेटमा पन्छाउँदै सूर्यविनायक च्याम्पियन बन्न सफल भएको हो ।
सूर्यविनायकले प्रतियोगिताको उपाधिसँगै एक लाख ५१ हजार रुपैयाँ नगद पुरस्कारसमेत हात पारेको छ । सूर्यविनायकसँग २३–२५, २५–२३, २५–२३ र २५–१५ को सेटमा पराजित गोदावरी भने ७५ हजार रुपैयाँ नगद पुरस्कारमा चित्त बुझाउन बाध्य भयो ।
प्रतियोगितामा सूर्यविनायकका चित्रबहादुर केसी मोस्ट भ्यालुएबल खेलाडीसँगै उत्कृष्ट सर्भर बन्न सफल भए । सूर्यविनायकलाई उपाधि जिताउन योगदान गरेका उनले व्यक्तिगत रुपमा मोस्ट भ्यालुयबल खेलाडीको उपाधिसँगै नगद दस हजार र उत्कृष्ट सर्भरको उपाधिसँगै पाँच हजार नगद जितेर व्यक्तिगत रुपमा पन्ध्र हजार रुपैयाँ नगद पुरस्कार जित्न सफल भए ।
त्यस्तै, सूर्यविनायकका उत्सव खड्का उत्कृष्ट सेटर र कमल सुनार उत्कृष्ट ब्लकर घोषित हुँदै जनही पाँच हजार नगद पुरस्कार जित्न सफल भए ।
गोदावरी समग्रमा उपविजेता भए पनि उसका तारा भट्ट उत्कृट स्पाइकर र विनोद चन्द उत्कृष्ट डिफेन्डर घोषित भए । उनीहरुले पनि पाँचपाँच हजार रुपैयाँ हात पारे ।
प्रतियोगिताकै दावेदार मानिएको ललितपुर महानगरपालिका भने चौथोमा सीमित हुन पुग्यो । नेपाली भलिबलका राष्ट्रिय कप्तान इम रानामगरको नेतृत्वको ललितपुर लिगमा हराएको रुपन्देहीको तिलोत्तमा नपासँग ३–० को सोझो सेटमा पराजित भएको थियो ।
तेस्रो भएको तिलोत्तमाले ३० हजार नगद पुरस्कार जित्दा ललितपुर महानगरपालिका २० हजारमै चित्त बुझाउन बाध्य भएको थियो ।
देशभरका २१ नगरपालिकाको सहभागिता रहेको प्रतियोगिताका विजेता, उपविजेता भएको नपा तथा खेलाडीलाई नेपाल मजदुर किसान पार्टीका केन्द्रीय सचिव एवं भक्तपुर क्षेत्र नं १ का सांसद प्रेम सुवालले मेडल, ट्रफी, प्रमाणपत्रसँगै नगद पुरस्कार वितरण गरेका थिए ।