काठमाडौं : नेपाली कांग्रेसको संसदीय दलको बैठक बसिररेको छ । देश संघीय संरचनामा गइसकेपनि कांग्रेसको विधान पुरानै भएकाले विधान संशोधन गर्न संसदीय दलको बैठक शनिबार बसेको हो । विधान संशोधन हुन नसक्दा संसदीय दलको नेता छनौटमासमेत समस्या सिर्जना भएको बताइएको छ ।
संसदीय दलको नेताका सभापति शेरबहादुर देउवालाई महामन्त्री डा। सशांक कोइराला र पूर्वमहामन्त्री प्रकाशमान सिंहले चुनौती दिइरहेका छन्। उनीहरु देउवालाई सर्वसम्मत संसदीय दलको नेता हुन नदिने कसरतमा छन्। महामन्त्री कोइराला र पूर्व महामन्त्री सिंहले पनि संसदीय दल नेताका लागि आफूलाई प्रतिस्पर्धीकारुपमा अघि सारिसकेका छन् ।
यसैबीच कांग्रेसले आगामी आइतबार केन्द्रीय कार्यसमिति बैठक बोलाएको छ । कांग्रेस पार्टी कार्यालयका मुख्यसचिव कृष्णप्रसाद पौडेलले शनिबार संसदीय दलको बैठकलगत्तै आइतबार बिहान ९ बजे पार्टी कार्यालयमा केन्द्रीय कार्यसमिति बैठक बोलाएको विज्ञप्तिमार्फत जनाएका छन् ।
पछिल्लो समय कांग्रेसमा संसदीय दलको नेता चयनसम्बन्धमा आन्तरिक कलह चर्कंदा पार्टी कार्यसमिति बैठक बोलाउने निष्कर्षमा पुगेको छ । पार्टीले मंसिरमा भएको प्रतिनिधिसभा र प्रदेशसभा चुनावमा लज्जास्पद हार बेहोरेपछि सभापति शेरबहादुर देउवाको नेतृत्व दबाबमा परेको छ । पार्टीभित्र महासमितिदेखि महाधिवेशनसम्मको चर्को आवाज उठिरहेका बेला सभापति देउवा आफैं संसदीय दलको नेता बन्न हुने नहुने बहस बाक्लिएको छ । संसदीय दलको नेतामा देउवासँग प्रतिस्पर्धा गर्ने घोषणा प्रकाशमान सिंहले गरिसकेका छन् । पौडेलका अनुसार आइतबार बस्ने केन्द्रीय कार्यसमिति बैठकको एजेन्डा संसदीय दलको नेताभन्दा पनि पार्टीको आन्तरिक कुरा नै हुने बताए । संसदीय दलको नेता चयनबारे संसदीय दलको बैठकमा नै छलफल हुने उनले बताए ।
चुनावमा पराजयपछि गत ४ माघमा पहिलोपल्ट बसेको पार्टीको एकदिने केन्द्रीय कार्यसमिति बैठकमा सभापति देउवाले आफू सरकारबाट अलग्गिएपछि चुनावको समीक्षा गर्न केन्द्रीय कार्यसमिति बैठक बोलाउने प्रतिबद्धता जनाएका थिए । त्यही बैठकले सबै निर्वाचन क्षेत्रमा कांग्रेसका उम्मेदवार नेतालाई निर्वाचनसम्बन्धी प्रतिवेदन पेस गर्न निर्देशन दिएको थियो । आइतबारको केन्द्रीय कार्यसमिति बैठकमा ती प्रतिवेदनमाथि छलफल हुने उनले बताए । उनले निर्वाचन क्षेत्रका प्रतिवेदन पार्टी कार्यलयमा आउन थालेको जानकारी दिए ।
कांग्रेसले केन्द्रीय कार्यसमिति बैठकमा चुनावको समीक्षा गर्दै महासमिति बैठकको मितिसमेत तय गर्ने यसअघि जनाएको थियो । स्वयं सभापति देउवाले आफू सरकारबाट बाहिरिएपछि बस्ने केन्द्रीय कार्यसमिति बैठकले चुनावको समीक्षा गर्ने र महासमिति बैठकले अघि बढ्ने बाटो तय गर्ने घोषणा गरेका थिए । कांग्रेस नेता शेखर कोइराला, प्रकाशमान सिंह, गगन थापालगायत नेताहरूले सार्वजनिक रूपमै पार्टीमा व्यापक सुधारको खाँचो रहेको भन्दै महासमिति बैठकको माग गरिरहेका छन् ।
गगन थापा, चन्द्र भण्डारी, प्रदीप पौडेललगायत नविन्द्रराज जोशीको समुहले काग्रेस भित्र पुर्नजागरण अभियानको नै घोषणा गरिसकेका छन् । उनीहरूले स्थानीय, प्रदेश तहसम्म विभिन्न समूहसँग अन्तक्रिया गरेर पार्टीको सबै तहमा त्यसलाई सुझावका रूपमा पेस गर्ने बताएका छन् । साथै त्यसरी तयार दस्तावेज महासमिति र महाधिवेशन बैठकमा प्रस्तुत गर्ने घोषणा गरेका छन् ।
कांग्रेस संसदीय दल: शेरबहादुरको विकल्पमा प्रकाशमान कि शशांक ?
प्रतिक्रिया दिनुहोस !
