काठमाडौं : नेकपा एमालेका नेता रघुवीर महासेठले फोरम र राजपा बिना शर्त सरकारमा सहभागी हुनुपर्ने बताएका छन्। शनिबार रिपोर्टर्स क्लबले गरेको साक्षात्कारमा बोल्दै नेता महासेठले एमाले–माओवादी संविधान संशोधन गर्न तयार रहेकोले फोरम र राजपालाई बिना शर्त तत्काल सरकारमा सहभागी हुन आग्रह गरेका हुन्।
‘फोरम र राजपाले अब सरकारमा आउन ढिलाई गर्नुहुँदैन्’, महासेठले भने, ‘उहाँहरु बिना शर्त सरकारमा सहभागी हुनुपर्छ। समस्या समाधान भएन भने उहाँहरुले सरकार छोड्न सक्नुहुन्छ।’
यद्धपी उनले आफूहरुले फोरम र राजपालाई सरकारमा सहभागी गराउने सन्दर्भमा ‘खाए खा नखाए घिच’ को व्यवहार भने नगरेको स्पष्ट पारे। महासेठले भने,‘हामी त उहाँहरुलाई स–सम्मान सरकारमा ल्याउन चाहन्छौं, यसैको लागि अहिले हामी प्रयासरत छौं, सरकारलाई सहयोग गर्नुहोस्, आउनुहोस् मिलेर देश बनाऔं भन्ने हाम्रो आग्रह छ।’
पूर्वमन्त्री समेत रहेका नेता महासेठले आफूहरु देश र जनताको हितमा संविधान संशोधन गर्न तयार रहेको विश्वास दिलाए। उनले भने,‘यदि साँच्चिकै संघीय समाजवादी फोरम र राजपाले भनेजस्तो संविधानमा समस्या छ भने उहाँहरु त्यसको लागि पहिले सरकारमा त आउनुपर्यो, हामी पनि संशोधन गर्नुपर्छ भन्ने पक्षमा छौं।’
उनले उपेन्द्र यादव नेतृत्वको संघीय फोरम सरकारमा आउने विषयमा आफू सकारात्मक रहेको पनि सुनाए। ‘नयाँ नेपाल बनाउन एमाले र माओवादी केन्द्रका नेतृत्वमा करिब दुई तिहाईको सरकार छ, तर यसमा उहाँहरुको पनि योगदान होस् भन्ने हाम्रो चाहना छ’ उनले भने।
प्रतिक्रिया दिनुहोस !
