शेरधनमाथि बम प्रकरण: पूर्वमन्त्री राईलाई मुद्दा चलाउन भोजपुर ल्याइयो
फागुन १६, २०७४ बुधबार १४:४४:०
भोजपुर: प्रदेश सभाका तत्कालिन उम्मेदवार शेरधन राईमाथि बम आक्रमण गरेको आरोपमा नेत्रविक्रम चन्द नेतृत्वको नेपाल कम्युनिष्ट पार्टीका नेता तथा पूर्वमन्त्री पदम राईलाई प्रहरीले पक्राउ गरी बुधबार जिल्ला प्रहरी कार्यालय भोजपुर ल्याइएको छ ।
उनलाई प्रदेश नम्बर १ मा हाल मुख्मन्त्री रहेका राईमाथि चुनावी प्रचारपसारको क्रममा गत मंसिर ४ गते ट्याम्के-मैयुङ गाउँपालिकास्थित गुम्बामा बम आक्रमण गरेको आरोपमा गत फागुन १३ गते मोरङको केराबारीबाट प्रहरीले पक्राउ गरेको थियो ।
नेता राईलाई त्यही प्रकरणमा मुद्दा चलाउन भोजपुर ल्याइएको हो । पक्राउ परेका राईलाई मुद्दाको फैसलाका लागि जिल्ला अदालत भोजपुरमा पेश गरिएको जिल्ला प्रहरी कार्यालय भोजपुरका प्रहरी निरीक्षक खेम नेपालले बताए ।
राई भोजपुरका पुराना माओवादी नेता हुन्। उनी आवास तथा भौतिक योजना राज्यमन्त्री पनि भएका थिए । त्यहीबेला उनी २०६४ को संविधानसभा निर्वाचनमा भोजपुर १ बाट सभासद भएका थिए । राई माओवादीनिकट किरात राष्ट्रिय मुक्तिमोर्चाका केन्द्रीय अध्यक्ष पनि भएका थिए ।
प्रतिक्रिया दिनुहोस !
