पुलिस क्वाटरफाइनलमा प्रवेश

विर्तामोर्ड : रेजिन सुब्बाको एकमात्र गोलले नेपाल पुलिस क्लब तेस्रो रमपम झापा गोल्डकपको क्वाटरफाइनलमा प्रवेश गरेको छ । रुपन्देही ११ र नेपाल पुलिस क्लब बीच आइतबार भएको खेलमा एकमात्र निर्णायक गोलका लागि ८१ मिनेट पर्खनुपरेको थियो ।

८१ औं मिनेटमा सुमन लामाको पासलाई सदुपयोग गर्दै सुब्बाले गोल लगाएका थिए । रुपन्देही ११ का गोल किपर सोजित गुरुङ बिट भइसकेको अवस्थामा डि एरियाभित्र रहेका सुब्बाले गोल गरेका हुन् ।

खेलको १८ औं मिनेटमा पुलिसका सुमन लामाको प्रहार पोष्ट बारमा लागेर फर्किएको थियो । २५ औं मिनेटमा पुलिसका रेजिन सुब्बाले गोलकिपर बिट भइसकेपछि गरेको प्रहार रुपन्देहीका डिफेन्डर गौरब बुढाथोकीले गोललाइनबाट बचाएका थिए ।

५३ औं मिनेटमा रुपन्देहीका निशान लिम्बुले गोल गर्न सकेनन् । उनले गोलकिपरमात्र भएको समयमा फितलो प्रहार गरेका थिए । ७२ औं मिनेटमा पुलिसका रवि पासवानको कडा प्रहार रुपन्देहीका गोलकिपर सोजीत गुरुङले पञ्च गरेर बाहिर फ्यालेका थिए ।

खेलपछि भएको पोष्ट म्याच कन्फ्रेन्समा बोल्दै पुलिसका प्रशिक्षक अनन्त थापाले नेपालकै स्तरीय र प्रतिष्ठित प्रतियोगिता भएकाले उपाधि रक्षा गर्ने रणनीति लिएको बताए । खेलमा पाएका धेरै अवसर फ्रेममा नपर्दा स्कोर बढी हुन नसकेको उनको भनाइ छ । आगामी खेलमा अझ सुधारिएको प्रदर्शन गर्ने समेत उनले बताए । उनले डोमालाल रंगशाला उच्चस्तरीय भएको पनि टिप्पणी गरे ।

पराजित टीमका प्रशिक्षक दयाराम सापकोटाले खप्तड गोल्डकपपछि आफ्ना खेलाडी रेष्टमा रहेको र पुलिससँगको खेलमा दोस्रो तहका खेलाडी उतारेका कारण सोचेजस्तो नतिजा प्राप्त नभएको बताए । उनले आफ्नो टीमका भरपर्दा खेलाडी दीपक राई घाइते भएका कारण पनि राम्रो खेल्न नसकेको बताए ।

खेलको म्यान अफ द म्याच बिजेता नेपाल पुलिस क्लबका सुमन लामा घोषित भए । उनले २५ हजार रुपैयाँ पुरस्कार पाप्त गरे । सोमबारको खेल सशस्त्र प्रहरीको एपीएफ क्लब र थ्री स्टार क्लब बीच हुने आयोजक समितिले जनाएको छ । गोल्डकप विजेताले नगद १२ लाख ५१ हजार र ट्रफी पाउनेछ ।