काठमाडौं: प्रशासनिक पत्रकारितामार्फत स्थायी सरकार मानिने निजामती क्षेत्र र सरकारलाई खबरदारी गर्दै पत्रकारितामा उल्लेख भूमिका निर्वाह गरेको भन्दै अन्नपूर्णकर्मी सागर पण्डित सम्मानित भएका छन् । रौतहट टाइम्स साप्ताहिकको २० औं वार्षिकोत्सवमा राजधानीमा आयोजित विशेष कार्यक्रममा पत्रकार पण्डित सम्मानित भएका हुन् ।
प्रमुख अतिथि एमाले वरिष्ठ नेता माधवकुमार नेपालले पत्रकार पण्डितलाई सम्मानपत्र प्रदान गरेका थिए । समाजसेवामा उल्लेख्य भूमिका निर्वाह गरेका नारायणप्रसाद पौडेल र अञ्जु झालाई पनि नेता नेपालले सम्मान गरेका थिए ।
उक्त कार्यक्रममा बोल्दै नेता नेपालले एमाले नेतृत्वको सरकार विकास र समृद्धिमा निरन्तर लागिरहने सक्रिय सरकार भएको दाबी गरेका छन् । कार्यक्रममा नेता नेपालले एमाले सरकार भ्रष्टचारीको जालो तोड्न सफल हुने दाबी गरे । ‘सबै ठाउँमा हुने सेटिङ र अनियमितताले देशको अवस्था बर्बाद र ध्वस्त छ, अब यसमा आमूल परिवर्तन र सुधार आवश्यक छ’, उनले भने ।
रौतहट टाइम्सका प्रकाशक तथा सम्पादक गोविन्द चौंलागाईको अध्यक्षतामा भएको कार्यक्रममा जनसंख्या तथा वातावरण मन्त्री लालबाबु पण्डितले अब राजधानीमा फोहोर गर्ने जोसुकैलाई पनि ठाउँको ठाउँ कारवाही गर्ने चेतावनी दिए ।
प्रतिक्रिया दिनुहोस !
