नियुक्तिमा चलखेल भएको भन्दै गाउँपालिका कार्यालयमा ताला
राजविराज : कर्मचारी नियुक्तिमा आर्थिक चलखेल भएको भन्दै सप्तरीको अग्नीसाइर कृष्णसवरन गाउँपालिका कार्यालयमा शुक्रबार तालाबन्दी गरिएको छ ।
गाउँपालिका अध्यक्ष र प्रमुख प्रशासकीय अधिकृतले अनियमितता र धाँधली गरी आफ्ना मानिसलाई अनमी र कार्यालय सहयोगी पदमा नियुक्ति गरेको विरोधमा गाउँलेले तालाबन्दी गरेका हुन् ।
गाउँपालिका अध्यक्ष परशुराम चौधरीका आफन्त र पैसा दिनेलाई छनौट गरिएको गाउँलेको आरोप छ । गाउँपालिका अध्यक्ष चौधरी र प्रमुख प्रशासकिय अधिकृत राजिबकुमार झाले मिलोमतो गरी अनुभवी, दक्ष र योग्य व्यक्तिलाई पाखा लगाएर कर्मचारी छनौट गरिएको सुर्यनारायण चौधरीले जनाए ।
यसअघि भएको परीक्षा बदर गरेर निष्पक्ष, धाँधलीरहित परीक्षाको माध्यमबाट कर्मचारी भर्ना गर्नुपर्ने माग राख्दै गाउँपालिका कार्यालयमा तालाबन्दी गरिएको स्थानीय सुर्यनारायण चौधरीले बताए ।
अध्यक्ष चौधरीले प्रमुख प्रशासकीय अधिकृत झा नेतृत्वको टिमले छनौट गरिएको कर्मचारी नियुक्तिमा आफ्नो कुनै संलग्नता नरहेको बताए । कर्मचारी नियुक्तिका लागि कार्यालयले गत फागुन २० र २९ गते परिक्षा लिएको थियो ।
गाउँलेका मागबारे छलफल गर्न गाउँपालिका तयार भएपछि साँझ ताला खोलेर वार्ता भएपनि छलफल विना निष्कर्ष टुङ्गिएको छ । वार्तामा अल्मल्याउने बाहेक अरु कुरामा गाउँपालिका गम्भिर नभएकाले आइतबारदेखि अनिश्चितकालिन तालाबन्दी गरिने जयसागर चौधरीको भनाइ छ ।
प्रतिक्रिया दिनुहोस !
