सुन व्यवसायी हत्याका मुख्य अभियुक्त पक्राउ
मलंगवा : सर्लाहीको कविलासी नगरपालिका –२ पिपरियाका सुन व्यवसायी सुनिल साहको हत्याका मुख्य अभियुक्तलाई प्रहरीले पक्राउ गरेको छ । हत्याका मुख्य योजनाकार तथा साह माथि गोली प्रहार गर्ने लालबन्दी नगरपालिका –२ का ४५ वर्षीय राजु भनिने उमेश पासवानलाई पक्राउ गरिएको जिल्ला प्रहरी कार्यालय सर्लाहीले जनाएको छ ।
पासवानलाई इलाका प्रहरी कार्यालय हरिपुरका प्रहरी निरीक्षक अनिल ठकुरी र नवलपुरबाट खटिएका प्रहरी नायव निरीक्षक राजेश यादवको संयुक्त टोलीले लालबन्दी –२ बाट मंगलबार पक्राउ गरेको हो ।
साहको हत्यापछि पासवान भारतको विभिन्न स्थानमा लुकीछिपी बस्दै आएका थिए । घर आएको सुराकी पाएपछि प्रहरीले पासवानलाई पक्राउ गरेका हो । पासवानलाई बिहीबार पत्रकार सम्मेलन गरेर सार्वजनिक गरिएको हो ।
हरिपुर नगरपालिका –९ पिडारी बजारमा सुनचाँदी व्यवसाय गर्दै आएका साह बुबा नागेन्द्र साहको साथमा ना.४५ प १५०३ नम्बरको मोटरसाइकलमा साँझपख घर फर्किदै गर्दा पिपरिया र पिडारीको सिमामा रोकेर गोली प्रहार गरिएको थियो ।
साहका साथबाट उनीहरुले ८ तोला सुन, ४ किलो चाँदीका गहना र नगद ४० हजार समेत लुटेर फरार भएका थिए । गोली लागि गम्भिर घाइते भएका साहलाई उपचारका लागि मलंगवा ल्याउँदै गर्दा बाटैमा मृत्यु भएको थियो ।
पक्राउ परेका पासवान यो भन्दा अगाडी पनि सिरहा र रुपन्देही जिल्लामा मोस्टवान्टेडको सुचीमा थिए । आपराधिक क्रियाकलाप गरेका पासवानलाई सिरहा र रुपन्देही जिल्लाबाट पनि वारेन्ट जारी गरिएको प्रहरीले जनाएको छ । जिल्ला अदालत रुपन्देहीबाट २०७३ कात्तिक २२ गते डाँका मुद्धामा वारेन्ट जारी गरिएको छ ।
त्यसैगरी सोही अदालतबाट २०७३ चैत्र १ गते कर्तव्य ज्यान, ज्यानमार्ने उद्योग र चोरी मुद्धामा वारेन्ट जारी गरिएको छ । सिरहा जिल्ला अदालतबाट २०७३ साल कात्तिक ७ गते र २०७३ साल मंसिर २६ गते डाँका र हातहतियार मुद्धामा वारेन्ट जारी गरिएको छ । सर्लाही जिल्लाबाट पनि २०७४ साल माघ ९ गते खुनडाँका तथा संगठित अपराध मुद्धामा वारेन्ट जारी भई इलाका प्रहारी कार्यालय नवलपुरबाट म्याद तामेल भएको प्रहरीले जनाएको छ । पासवान भारतका पनि विभिन्न अपराधिक क्रियाकलापमा संलग्न रहेको प्रहरीले जनाएको छ ।
प्रहरीले हत्यामा संलग्न अन्य ४ लाई कात्तिक ५ गते नै पक्राउ गरि पूर्पक्षका लागि थुनामा राखेको छ । कात्तिक ५ गते पक्राउ पर्नेमा लालबन्दी –२ का २७ वर्षीय जयप्रकाश पासवान, बरहथवा ७ गंगापुरका २३ वर्षीय कृष्ण साह, सोही स्थानका २५ वर्षीय प्रभु नारायण महतो र कविलासी १ पिपरियाका २१ वर्षीय विरेन्द्र मण्डल रहेका छन् ।
हत्या गरिएका साह नागेन्द्र साहका एक्ला सन्तान हुन् । छोराको हत्या भएपछि बुबा विछिप्त छन् । पत्रकार सम्मेलनमा जिल्ला प्रहरी कार्यालय पुगेका बुबा नागेन्द्रले हत्याको अभियोगमा पक्राउ परेका पासवानलाई आफ्नो छोराको कुन गल्ती थियो भनेर रुदैं सोधेका थिए ।