जनकपुरको मुख्य बजारमा चल्यो डोजर
जनकपुरधामः जनकपुर उपमहानगरपालिकाको मुख्य बजार क्षेत्रको सडक विस्तार गर्न घर र पसलहरु भत्काइएको छ । प्रदेश नं. २ को राजधानी समेत रहेको जनकपुरमा नयाँ मापदण्ड अनुसार सडक र नाला निर्माणमा बाधक भवनहरु भत्काउन थालिएको हो ।
पटक पटक सूचना दिँदा पनि अटेर गरेपछि शनिवारदेखि उपमहानगरपालिका कार्यालयले आफैँ डोजर लगाएर घर भत्काउन सुरु गरेको हो ।
उपमहानगरपालिकाको शुक्रबारको निर्णयानुसार भवन भत्काउने अभियान सुरु भएको उपमेयर रिता झाले जानकारी गराएकी छिन् । एकीकृत शहरी विकास परियोजना अन्तर्गत जनकपुरको परिक्रमा सडकमा नाला निर्माण भइसकेको छ । तर मुख्य बजार क्षेत्रको विस्तार लामो समयदेखि समस्या बनेको थियो ।
त्यो सडक अन्तर्गत उपमहानगरका प्रमुख लालकिशोर साहको घर समेत परेको छ । प्रमुख स्वयमले आफ्नो घर भत्काएर सडक विस्तारको सुरुवात गरेका थिए । जनकचौकदेखि शिव चौक हुँदै भानु चोकसम्म २९ फिटको सो सडकलाई साढे ५२ फिटको बनाउन लागिएको हो ।
जनकपुरको मुख्य व्यापारिक केन्द्र रहेको यस सडकमा उपमहानगरको डोजर आएपछि घरधनीहरुले आफै पनि भत्काउन सुरु गरेका थिए । सुरक्षाकर्मीको बाक्लो उपस्थितिमा सडकमा पर्ने अधिकांश भवन भत्काउन थालेपछि हेर्नेहरुको घुइँचो लागेको थियो ।
जनकपुरमा एसियाली विकास बैंकको क्रण तथा अनुदानमा सञ्चालित परियोजना अन्तर्गत एक अर्ब ९० करोड बजेटमा सडक विस्तार र ढल नाला निर्माण भइरहेको छ ।
जसमध्ये १० किलोमिटर सडक विस्तार र २० किलोमिटर ढल निर्माण भइरहेको छ । झण्डै २ सय घर अझै भत्काउनुपर्ने परियोजनाले जनाएको छ । बजार क्षेत्रको सडक १६ मिटर चौडाईको बनाइँदैछ । जसमा सडकको दुवैतर्फ एक एक मिटर फुटपाथ पनि बन्नेछ ।