भारतीय दुतावासको सम्पर्क कार्यालयमा बम विस्फोट
विराटनगर: विराटनगर महानगरपालिका-१३ स्थित भारतीय राजदूतावास इकाइ कार्यालयको पश्चिमतर्फको पर्खालमा सोमबार साँझ बम विष्फोट भएको छ ।
साँझ आठ बजेर १५ मिनेटमा भएको बम विष्फोटबाट पर्खालमा सामान्य क्षति भएको मोरङका प्रहरी उपरीक्षक अरुणकुमार विसीले जानकारी गराएका छन् ।
मोटरसाइकलमा आएका दुई जनाले झोलामा बोकेर ल्याएका बम राखेर त्यहाँबाट भागेको प्रहरीको सुरुवाती अनुसन्धानबाट खुलेको छ ।
२०६४ सालमा सप्तकोशीमा आएको बाढीले बाँध भत्काएर नेपाल-भारत दुवैतर्फ ठूलो क्षति गरेपछि रातह र बाँध पु:निर्माणका लागि भन्दै विराटनगरमा सम्पर्क कार्यालय खोलिएको थियो ।
सम्पर्क कार्यालय हटाउन परराष्ट्र मन्त्रालयले निरन्तर आग्रह गर्दै आए पनि भारतले अटेर गर्दै आएको थियो । यो कार्यालयमा सुरक्षाकर्मी राखेर भारतको झण्डा पनि फहराइन्छ ।
अनाधिकृत ढंगमा राखिएको कार्यालय तुरुन्त हटाउनु परराष्ट्र मन्त्रलायले भारतीय दूतावासमा पत्राचार गरिसके पनि भारतीय पक्षले बेवास्ता गर्दै आएको थियो ।
परराष्ट्रले यो कार्यालयको कुनै प्रशासनिक र अन्य काम नरहेको जनाएको छ । यस कार्यालयले स्थानीय तहमा जनसम्पर्क विस्तार, पार्टी गर्ने, सूचना बटुल्ने र भेला गर्दै आएको छ ।
तत्कालीन परराष्टमन्त्री उपेन्द्र यादवले उद्घाटन गरेको कार्यालय सुरुमा उद्योग संगठन मोरङ परिसरमा थियो । पछि यसलाई बरगाछीमा सारियो । अहिले त्यहाँबाट सारेर कोशी राजमार्गको विराटनगर दक्षिण मलाया रोडस्थित एक घरमा राखिएको छ ।
यसअघि मोहन बैद्य नेतृत्को माओवादी क्रान्तिकारी र नेत्रविक्रम चन्द विप्लव नेतृत्वको नेकपाले बिराटनगरमा रहेको भारतीय कार्यालय हटाउन माग गरेका थिए ।
उनीहरुले दुई वर्षअघि नै बिराटनगरमा रहेको भारतीय कार्यालय हटाउन चेतावनी दिएका थिए । उनीहरुले यदि नहटाए आफैँले फालिदिने बताएका थिए ।
प्रतिक्रिया दिनुहोस !
