ट्रिपरले किच्दा एकको मृत्यु, एक घाइते
नुवाकोट : नुवाकोटको देवीघाट–गल्छी सडकमार्गको वीचमा रहेको कोल्पुटारमा मंगलवार गुडिरहेको ट्रिपरले ठक्कर दिँदा एक युवकको घटनास्थलमै ज्यान गएको छ भने एक जना घाइते भएका छन् ।
गल्छीबाट देवीघाटतर्फ जांदै गरेको बा २ क ४००८ नम्बरको ट्रिपरले सोही दिशाबाट आइरहेको बा ८६ प ९५२० नम्बरको मोटरसाइकललाइ ठक्कर दिँदा मोटरसाइकलका चालक धादिङको गल्छी गाउपालिका वडा नं. १ वस्ने ५० वर्षीय हरि खतिवडाको घटनास्थलमै ज्यान गएको जिल्ला प्रहरी कार्यालय नुवाकोटले जनाएको छ ।
दुर्घटनामा मोटरसाइकलको पछाडि सोही स्थानका ४७ वर्षीय नवराज ओझा घाइते भई उपचारको लागी काठमाडौ पठाइएको जिल्ला प्रहरी प्रमुख तथा प्रहरी उपरीक्षक वसन्तबहादुर कुंवरले वताए । शव घटनास्थलमै रहेको छ भने चालक फरार रहेका छन् । प्रहरीले ट्रिपर र मोटरसाइकल नियन्त्रणमा लिएको छ ।
प्रतिक्रिया दिनुहोस !
