तुलसीपुर : सधैं कक्षामा विद्यार्थीलाई मात्रै पढाउने शिक्षकले अब शैक्षिक गुणस्तर विकास गर्न शिक्षकलाई पनि पढाउने भएका छन् । दाङका १८ जना शिक्षकलाई प्रशिक्षकको रूपमा विकास गर्ने गरी शैक्षिक तालिम केन्द्रमार्फत प्रशिक्षक, प्रशिक्षण (टीओटी) तालिम दिएपछि उनीहरूले अब शिक्षकलाई बढाउने भएका हुन् ।
सामुदायिक विद्यालयमा विद्यार्थीको शैक्षिक गुणस्तर र सिकाइ उपलब्धि कमजोर देखिन थालेपछि त्यसको सुधारका लागि नेपाल सरकारले शिक्षा मन्त्रालय, शिक्षा विभागले सञ्चालन गर्न लागेको राष्ट्रिय प्रारम्भिक कक्षा पढाइ कार्यक्रमअन्तर्गत शिक्षकलाई प्रशिक्षक बनाउन लागिएको हो । पहिलो चरणमा दाङ र बाँकेका २८ जना माध्यमिक कक्षामा भाषा पढाउने शिक्षकलाई प्रशिक्षक बनाउन सातदिने तालिम दाङमा सुरु भएको छ ।
शैक्षिक तालिम केन्द्र तुलसीपुरका प्रमुख धनबहादुर ओलीका अनुसार प्रशिक्षक बनाएर पठाइएका शिक्षकले जिल्लाका हरेक विद्यालयमा दुई जना शिक्षकलाई सिकाइ सुधारका उपायसँगै तालिम प्रदान गर्ने र त्यसअनुसार कक्षाकोठा व्यवस्थान हुने जानकारी दिए । प्राथामिक तहमा अध्यापन गराउने शिक्षकलाई प्रशिक्षकले तालिम दिनेछन् । दाङका १८ जना माविका शिक्षक र स्रोत व्यक्ति र बर्दियाका १० जना मावि शिक्षक र स्रोत व्यक्ति पहिलो चरणमा प्रशिक्षक बन्दै छन् ।
यी प्रशिक्षकले दाङका ४ सय २० सामुदायिक विद्यालयका ८ सय ५० जना शिक्षकलाई तालिम दिने योजना रहेको तालिम केन्द्र प्रमुख ओलीले बताए । तालिममा सहभागी शिक्षकले कक्षामात्रै आफ्नो सिर्जनशीलता देखाउँदै आएको भए पनि अब अन्य शिक्षकलाई आफ्नो अनुभव र ज्ञान सिकाइ बाँड्ने अवसर मिलेको बताएका छन् ।
तालिमको संयोजक र व्यवस्थापन ईजीआरपी कार्यक्रमले गरेको छ । चालु शैक्षिक सत्रदेखि दाङका सबै सामुदायिक विद्यालयमा सघन रूपमा कार्यक्रम लागु भएपछि यो वर्ष तालिमलाई सुरुदेखि नै सञ्चालन गरेको ईजीआरपी कार्यक्रम संयोजक हल्लुप्रसाद चौधरीले जानकारी दिए ।
प्रतिक्रिया दिनुहोस !
