कांग्रेस बैठक स्थगित, अर्को बैठक वैशाख ९ गते
काठमाडौं : नेपाली कांग्रेसको शुक्रबारका लागि तोकिएको केन्द्रीय कार्य समितिको बैठक बस्दै नबसी स्थगित भएको छ । पार्टी केन्द्रीय कार्यालय सानेपामा शुक्रबार बस्ने भनिएको बैठक अधिकांश नेता केन्द्रीय राजधानी बाहिर भएकाले स्थगित गरिएको पार्टी कार्यालयका मुख्य सचिव कृष्ष्णप्रसाद पौडेलले जानकारी दिए ।
अर्को बैठक वैशाख ९ गते बिहान ११ बजेका लागि तोकिएको उनले जानकारी दिए । गत चैत ९ गतेदेखि सुरु भएको केन्द्रीय समिति बैठक चैत १६ गते पार्टीेका नेता खुमबहादुर खड्काको निधनमा स्थगित गरिएपछि बैठक वैशाख ७ गते बिहान ११ बजेका लागि निर्धारण गरिएको थियो ।
त्रिभुवन अन्तर्राष्ट्रिय विमानस्थलको अवरोधले काठमाडौँ उपत्यका बाहिर रहेका नेताहरु आज राजधानी आउन नसकेपछि बैठक स्थगित गर्नुपरेको पार्टी कार्यालयले जनाएको छ । त्रिभुवन विमानस्थलमा गएराति मालिन्दो एयरको विमान उडानका क्रममा चिप्लिएर धावनमार्गबाट बाहिर गएपछि विमानस्थल केही समयका लागि बन्द भएको थियो ।
कांग्रेसका वरिष्ठ नेता रामचन्द्र पौडेललगायत केन्द्रीय सदस्यहरु पार्टीका विभिन्न कार्यक्रमका लागि उपत्यका बाहिर छन् । यसअघिको बैठकमा केन्द्रीय सदस्यहरुले पार्टी नेतृत्वको कार्यशैलीका कारण निर्वाचनमा पार्टीले हार व्यहोर्नु परेको सम्बन्धमा पक्ष विपक्षमा तर्क राखेका थिए ।
गत मंसिर १० र २१ गते दुई चरणमा भएको प्रतिनिधि र प्रदेशसभा सदस्य निर्वाचनमा कांग्रेसले नराम्र्रो हार व्यहोरेको थियो । रासस
प्रतिक्रिया दिनुहोस !
