रिब्दीकोट(पाल्पा) : पढाई खर्च जुटाउनका लागि रिब्दीकोट गाउँपालिका–३ मालमुल पाल्पाका बालवालिका काफल बेच्ने गरेका छन् । तम्घास–रिडी–पाल्पा–बुटवल सडक खण्डको मालमुल सडक छेउँमा बसेर उनीहरुले काफल बेच्ने गरेका हुन् । सडकमा ओहोरदोहोर गर्ने बस, जिप, मोटसाइकलका यात्रुहरुलाई उनीहरुले काफल किनिदिन आग्रह गर्ने गरेका छन् । ‘एक मानालाई पचास रुपैयाँमा बेच्छौँ’, १३ वर्षिय सुजन विकले भने,‘आठ कक्षामा पढ्छु । बिदामा घर आएर काफल बेच्ने गरेका छौँ ।’
साथी टिका विक र विजय विकसँगै काफल बेच्ने गरेको उनले जानकारी गराए । पोखरामा पढ्दै गरेको बताउँदै विकले वार्षिक परीक्षापछि घरविदामा आएको बताएका छन् । आठदश दिन घरमा बसेर पोखरा जाने उनको भनाई छ । बारीमा फलेको काफल टिपेर प्लाष्टिकमा लिएर सडकमा ओहोरदोहोर गर्ने यात्रुहरुलाई उनीहरुले बेच्ने गरेका हुन् ।
उनीहरुले दैनिक काफल बेचेरै कम्तीमा चार÷पाँचसय रुपैयाँ कमाउने गरेको सुनाए । ‘काफल बेच्न त्यति गाह्रो हुँदैन’, विजयले भने,‘बाटोमा आउँदाबित्तिकै बिक्री हुन्छ ।’ बोटमा चढेर टिप्न मात्र समस्या हुने गरेको उनको भनाई छ । बिहान टिपेको काफल दिउँसो नहुँदै सकिने गरेको समेत उनीहरुले बताएका छन् । ताजा हुने भएकाले पनि यात्रुहरुले उनीहरुले लिएको काफल सजिलैसँग खरिद गर्ने गरेका छन् ।
‘काफल बेचेर आएको पैसाले कापी, कलम किन्ने हो’,विकले भने,‘दुइचार हजार जम्मा हुन्छ होला ।’ यस क्षेत्रका धेरैजसो बालबालिका सिजनमा फलेको फल टिपेर पढाइ खर्चको जोहो गरेका छन् । गुराँसका फूल, काफल, मेवा, काक्रा, सुन्तला लगायत फलफूल बिक्री गरेर खर्च जुटाउने गरेको स्थानीय नागरिक समाजका अगुवाहरुले बताएका छन् ।
प्रतिक्रिया दिनुहोस !
