दाङ : पूर्व-पश्चिम राजमार्ग अन्तर्गत दाङको रिहारमा शनिबार साँझ भएको सवारी दुर्घटनामा २ जनाको मृत्यु भएको छ। यो घटनामा पाँच जना गम्भीर घाइते भएका छन्। पूर्व-पश्चिम राजमार्ग अन्तर्गत दाङको लमही नगरपालिका-९ रिहारमा ट्रक र विङगर हाइस गाडी एक आपसमा ठोक्किँदा दुई जनाको ज्यान गएको प्रहरीले जनाएको छ।
घोराहीबाट नेपालगञ्जतर्फ जाँदै गरेको भे १ ज ६१४ नम्वर विङगर र विपरित दिशाबाट आइरहेको ना ६ ख ६६४८ नम्बरको ट्रक ठोक्किँदा लमही-९ च्याउखोलाका २८ वर्षीय खडगबहादुर बुढा र बर्दिया ठाकुरबाबा नगरपालिका-१ का २० वर्षीय विवेक थारुको मृत्यु भएको प्रहरीले जनाएको छ।
दुर्घटनामा ४ जना गम्भीर घाइते भएका छन् भने एक जना सामान्य घाइते भएको वडा प्रहरी कार्यालय लमहीले जनाएको छ।
गम्भीर घाइते प्युठानका वर्ष २२ का सुस्मा केसी, लमही नगरपालिका ९ अमिलिया वस्ने वर्ष ३६ कि कमला विक, रोल्पा वस्ने वर्ष ३५ कि दिलकुमारी थापा र रोल्पा घर भएकी वर्ष ७४ की सरी पुन लमही अस्पतालमा सामन्य उपचारपछि थप उपचारको लागि जिल्लाबाहिर रिफर गरिएको छ।
प्रतिक्रिया दिनुहोस !
