धर्म गुरु श्री निवासाचार्य २१ दिनपछि डिस्चार्ज, गोली हान्ने पत्ता लागेनन्

 विराटनगरः अज्ञात समूहको गोली प्रहारबाट २१ दिन अघि घाइते भएका हिन्दु धर्म गुरु श्री निवासाचार्य आइतबार अस्पतालबाट डिस्चार्ज भएका छन् । 

तीन साता सम्मको उपचारपछि विराटनगरको न्युरो अस्पतालले उनलाई डिस्चार्ज दिएको हो । उपचारमा संलग्न चिकित्सक डा. सुदिप खनियाले स्वास्थ्य अवस्थामा सुधार भएपछि अस्पताल बाहिरै बसेर आराम गर्ने गरी डिस्चार्ज दिइएको बताए । 

‘लामो समयको उपचारपछि स्वास्थ्य अवस्था सुधार भएका कारण गुरुलाई डिस्चार्ज दिइएको हो,’ उनले भने, ‘पहिलेकै अवस्थामा फर्कन भने केही समय लाग्ने छ ।’ गुरु स्वास्थ्य अनुकूल वातावरणका लागि भन्दै काठमाडौंतर्फ लागेका छन् । 

धेरै बोल्न नरुचाएका उनले आफूमाथि गोली प्रहार हुँदा दुःख व्यक्त गर्ने र सहयोग गर्ने सम्पूर्ण भक्तजन तथा उपचारमा उल्लेख्य भूमिका खेल्ने अस्पताललाई धन्यवाद दिए । 

डा. खनिया नेत्रृत्वकै चिकित्सक टोलीले उनको उपचार गरेको हो । एक दिन आईसियूमा राखेर ४५ मिनेट सम्म लगाएर गरिएको शल्यक्रिया सफल भएपछि बाँकी उपचार सम्भव भएको डा. खनियाले बताए । 

गुरुले चिकित्सक टोलीलाई सम्मान पनि गरेका छन् । गत चैत्र २५ गते विहान अज्ञात समूहले गोली प्रहार गरेर विराटनगरमा श्री निवासाचार्यलाई घाइते बनाएको थियो । दायाँ छातीमाथि कुम नजिकै लागेर गोली पार भएको थियो । 

धर्मगुरु श्री निवासाचार्यको उपचार खर्च नेपाल सरकारले ब्यहोर्ने भएको छ । विराटनगर स्थित न्युरो अस्पतालमा आइतबार आयोजित पत्रकार सम्मेलनमा गुरुको उपचारमा लागेको सबै खर्च नेपाल सरकारले ब्यहोर्ने जानकारी दिइयो । 

उनको उपचारमा एक लाख ५५ हजार रुपैयाँ लागेको अस्पतालले जनाएको छ । अस्पतालले उपचारका क्रममा एक लाख ३० हजार रुपैयाँ र औषधिमा २५ हजार रुपैयाँ खर्च भएको र सबै खर्च नेपाल सरकारको गृह मन्त्रालयले ब्यहोर्ने प्रतिवद्धता जनाइसकेको बताएको छ । 

गोली प्रहार भएपछि घटनामा संलग्न भएको आशंकामा हालसम्म पाँच जनालाई प्रहरीले पक्राउ गरेको थियो । तर घटनामा पक्राउ परेकाहरुको संलग्नता भने पुष्टि भएको छैन । 

मोरङ प्रहरी प्रमुख एसपी अरुणकुमार बिसीले नियन्त्रणमा लिइएकामध्ये तीनजनालाई छाडिएको बताए । ‘शंकास्पद पाँच जनालाई नियन्त्रणमा लिइएको थियो । कुनै पनि कोणबाट घटनामा उनीहरुको संलग्नता नदेखिएपछि तीन जनालाई छाडिएको छ,’ उनले भने, ‘अन्य दुई जनालाई हिरासतमा राखेर थप अनुसन्धान गर्ने काम भइरहेको छ । घटनामा उनीहरुको पनि संलग्नता पुष्टि भइसकेको छैन ।’ 

घटनाको अनुसन्धान गर्न र दोषी पत्ता लगाउनका लागि भनेर प्रहरी प्रधान कार्यालयले प्रहरी निरीक्षकको नेत्रृत्वमा चार जनाको टोली समेत खटाएको छ । घटना भए यता टोलीले मोरङमै रहेर काम गरिरहेको भए पनि अहिलेसम्म घटनाको वास्तविकता सम्म प्रहरी पुग्न सकेको छैन भने गोली हान्नेको पनि पहिचान भइसकेको छैन । गोली कसले हानेको हो भनेर घटनाको चुरो सम्म पनि प्रहरी पुग्न सकेको छैन ।