वासिङटन : अमेरिकी राष्ट्रपति डोनाल्ड ट्रम्पले उत्तर कोरियाली नेता किम जङ उनसँग हुने भनिएको शिखर वार्ता कोरियाली सीमाक्षेत्रमा नै गर्न सकिनेतर्फ सोमबार संकेत गरेका छन् ।
ट्रम्पले ट्विटरमा लेखेका छन्, ‘बैठकका लागि कैयौँ मुलुकहरू उचित भनी व्यक्त भएका छन् । तेस्रो मुलुकभन्दा उत्तर र दक्षिण कोरियाको सीमास्थित शान्तिगृह नै शान्ति र स्थायित्वका लागि धेरै प्रतिनिधिमूलक हुन सक्दैन र ? ’
कोरियाली प्रायद्वीपलाई पूर्णरूपमा आणविक निरस्त्रीकरण गर्न कोरियाली प्रतिबद्धताका लागि अमेरिकी राष्ट्रपति ट्रम्प र किमबीचको शिखर सम्मेलनको तयारी भइरहेको छ । उत्तर कोरियाली नेता किम र अमेरिकी राष्ट्रपतिबीच आगामी तीनचार सातामै वार्ता गरिने भएको छ ।
उत्तर कोरिया र दक्षिण कोरियाको सैन्य निषेधित क्षेत्र तथा सिमानामा रहेको कोरियाली युद्धविरामस्थल पानमुनजोममा रहेको शान्तिगृहमा गत शुक्रबार नेता किम र दक्षिण कोरियाली राष्ट्रपति मुन जे इनबीच ऐतिहासिक शिखर सम्मेलन भएको थियो ।
दुई कोरियाबीच सन् १९५३ मा युद्धविराम भएदेखि नेता किम दक्षिण कोरियाली भूमिमा पाइला टेक्ने पहिलो कोरियाली नेता हुन् । नेता किमले दक्षिण कोरियाली राष्ट्रपति मुनसँगै सिमानाको दक्षिणी भागबाट शान्तिगृहमा प्रवेश गरेका थिए ।
सोलका अनुसार उत्तर कोरियाले आफ्ना आणविक हतियार परीक्षणस्थललाई केही साताभित्र बन्द गर्ने र यसको पुष्टिका लागि अमेरिकी विज्ञलाई निमन्त्रणा गर्ने वाचा गरेको छ ।
अमेरिकाले उत्तर कोरियाविरुद्ध घुसपैठ नगर्ने वाचा गर्ने हो भने प्योङयाङलाई आणविक हतियारको आवश्यकता नरहने नेता किमले मुनसँगको कुराकानीमा स्पष्ट पारेका छन् । किमले आफू आणविक हतियारको पक्षमा नभएको पनि बताएका छन् । उत्तर कोरियाले आफ्नो सुरक्षाका निम्ति आणविक हतियार र क्षेप्यास्त्र परीक्षण गर्नुपरेको उनको दाबी छ ।
इन्डोनेसिया गर्न आह्वान
अमेरिकाका राष्ट्रपति डोनाल्ड ट्रम्प र उत्तर कोरियाका सर्वोच्च नेता किम जोङ उनबीच हुन लागेको शिखर सम्मेलन आफ्नो देशमा गर्न इन्डोनेसियाले आह्वान गरेको छ । शिखर सम्मेलनका लागि आवश्यक सम्पूर्ण व्यवस्था गर्न आफ्नो देश तयार रहेको इन्डोनेसियाको भनाइ छ ।
इन्डोनेसियाका राष्ट्रपति जोको विडोडोले कोरियाली प्रायद्वीपमा शान्ति स्थापना गर्ने प्रयासलाई आफूले पनि सहयोग गर्न चाहेको बताएका छन् । उनले उत्तर कोरियाका राजदूत एन क्वाङ आइआइ र दक्षिण कोरियाका राजदूत किम चाङबोमसँग स्टेट प्यालेसमा सोमबार भेटेर शिखर सम्मेलन इन्डोनेसियामा गर्न प्रस्ताव गरेका हुन् । ‘यदि उत्तर कोरियाका सर्वोच्च नेता किम र अमेरिकी राष्ट्रपति ट्रम्पबीच भेटवार्ताको तयारी भएको हो भने त्यसको आयोजना हामी गर्न चाहन्छौं’, राष्ट्रपति विडोडोले भने । उनले आफ्नो देशको प्रस्तावलाई सम्बन्धित नेताहरूले सकारात्मकरूपमा लिने विश्वास पनि व्यक्त गरेका छन् ।
यसअघि थाइल्यान्डले द्विपक्षीय वार्ताका लागि आफ्नो देशमा आउन आग्रह गरेको थियो । गत मंगलबार थाइल्यान्डका विदेशमन्त्री डोन प्रामुडविनैले शिखर वार्ताका लागि स्वयंसेवी तरिकाले सबै व्यवस्था गर्न थाइल्यान्ड तयार रहेको बताएका थिए । यसअघि मंगोलियाले पनि अमेरिका र उत्तर कोरियाबीच हुने शिखर वार्ता आफ्नो देशमा गर्न आह्वान गरेको थियो । चिनियाँ विदेशमन्त्री उत्तर कोरिया जाने
चिनियाँ विदेशमन्त्री वाङ यी उत्तर कोरिया जाने भएका छन् । उनी बुधबारदेखि दुई दिनसम्म उत्तर कोरियाको भ्रमण गर्न लागेका हुन् । चिनियाँ विदेश मन्त्रालयका प्रवक्ता लु काङले उक्त जानकारी दिएका छन् ।
उत्तर कोरियाली विदेशमन्त्री री योङ होको आमन्त्रणमा वाङ उत्तर कोरियाको भ्रमणमा जान लागेको पनि उनले खुलासा गरे । पछिल्लो समयमा उत्तर कोरिया विश्व राजनीतिको चासोको केन्द्र बनिरहेको छ । उत्तर कोरिया र दक्षिण कोरियाबीच पछिल्लो समयमा विकसित राजनीतिक परिस्थितिले गर्दा उत्तर कोरियाप्रति विश्वको चासो बढेको हो ।
गत शुक्रबार कोरियाली प्रायद्वीपमा शान्ति स्थापना गर्नेबारे महत्वपूर्ण सम्झौता भएको थियो । कोरियाले लिएको यो पछिल्लो रणनीतिका कारण विश्व राजनीतिक सरगर्मी बढेको बेला चिनियाँ विदेशमन्त्रीले गन थालेको यो भ्रमणलाई अर्थपूर्ण मानिएको छ ।
प्रतिक्रिया दिनुहोस !
