तुलसीपुर : दाङमा सामान्य बिरामी भएर उपचार गर्न मेडिकल गएकी एक जना महिलाको मृत्यु भएको छ । दाङको तुलसीपुरमा रहेको ज्योति मेडिकल क्लिनिकको लापरबाहीका कारण तुलसीपुर उपमहानगरपालिका–७ निवासी ४० वर्षीया प्रेमा कुमालको मृत्यु भएको आफन्तले आरोप लगाएका छन् । मेडिकलले हाइडोज र गलत औषधि प्रयोग गरेकाले कुमालको मृत्यु भएको आफन्तले जनाएका छन् । कुमालको मृत्युपछि आफन्त आन्दोलनमा उत्रिएकाले मेडिकल बन्द भएको छ । बिरामी मरेपछि प्रहरीले मेडिकल सञ्चालक वाइवी धौलाकोटी र डा. प्रकाश नेपालीलाई नियन्त्रणमा लिएको छ ।
‘सामान्य पेट दुखेको भनेर जाँच गर्न मेडिकल आएको केही छिनमै मृत्यु भयो’, कुमालकी बुहारी ललिता वलीले भनिन् । मेडिकलको लापरबाहीले सासूको ज्यान गएको भन्दै उनले बिरामीको ज्यान लिनेलाई कानुनी कारबाही हुनुपर्ने माग गरेकी छन् । कुन औषधि प्रयोग भयो भनेर हेर्न नदिएको पछि औषधि सच्याएर पर्चा दिएको बताइन् । ‘सामान्य अवस्थाको बिरामी औषधि खानेबित्तिकै कसरी मर्छ ? ’, उनले भनिन्, ‘मेडिकलले गलत औषधि प्रयोग गरेकाले सासूको ज्यान गएको हो । योे मेडिकल र डाक्टरको लापरबाही हो ।’
मृतक कुमालका आफन्त दीपक कुमालले यसको जिम्मेवारी अस्पताल र डाक्टरले लिनुपर्ने बताए । ‘उपचारमा चरम लापरबाही भएको छ’, उनले भने, ‘यसको जिम्मेवारी मेडिकल सञ्चालक र डाक्टरले लिनुपर्छ ।’ डाक्टर र अस्पताल दुवैलाई कारबाहीको दायरामा नल्याएसम्म मृतकको लास नउठाउने आफन्तले अडान लिएका छन् । मेडिकल सञ्चालक वाई वि धौलाकाटीले भने बिरामीको हर्टअट्याकका कारण मृत्यु भएको हुन सक्ने बताएका छन् । सुरुमा ग्यास्ट्रिकको समस्या हो कि भनेर डाक्टरले प्यान्टोपराजोल इन्जेक्सन दिएको र त्यसलगतै बिरामीले छाती दुख्यो भन्दै चिच्याउन थालेपछि इसीजी गर्न उनलाई तत्काल राप्ती अञ्चल अस्पताल लैजाने क्रममा मृत्यु भएको बताए ।
प्रतिक्रिया दिनुहोस !
