गुजरातीपछि मैथिलीमा प्रधानमन्त्रीको ट्वीटः प्रदेश २ लाई भनेजति बजेट
जेठ १, २०७५ मंगलबार १६:४:०
काठमाडौँ: प्रधानमन्त्री केपी शर्माले आगामी सरकारको नीति-कार्यक्रम तथा बजेटमा प्रदेश २ को विकास र समृद्धिको चाहनाको सम्बोधन गर्ने प्रतिवद्धता जनाएका छन् ।
प्रदेश २ का सांसदहरुको प्रतिनिधि मण्डलसँगको भेटघाटपछि सामाजिक सञ्जालमा मैथिली भाषामा ट्वीट गर्दै प्रधानमन्त्री ओलीले सरकारको नीति-कार्यक्रम र बजेटमार्फत तराई मधेसको विकास र समृद्धिका चाहनाको सम्बोधन गर्ने प्रतिवद्धता जनाएका हुन् ।
प्रदेश २ का सांसदले शिक्षा, स्वास्थ्य, कृषि, सडक, सिचाई तथा डुबान समस्याको समाधानबारे देखाएको अग्रसरता प्रति पनि प्रधानमन्त्रीले ट्वीटमार्फत् सांसदहरुलाई धन्यवाद दिएका छन् ।
उनले ट्वीटमा लेखेका छन्,‘म विश्वास दिलाउन चाहन्छु आगामी आर्थिक वर्षको सरकारको नीति-कार्यक्रम तथा बजेटमार्फत तराई-मधेसको विकास र समृद्धिको चाहनाको सम्बोधन हुन्छ ।’
उनले थप लेखेका छन्, ‘प्रदेश २ का माननिय सदस्यहरुको सर्वदलीय प्रतिनिधि मण्डलसँग भेट्दा खुसी लागेको छ, शिक्षा, स्वास्थ्य, कृषि, सडक,सिचाई तथा डुवान समस्या समाधानको दिशामा उहाँहरुले देखाउनु भएको अग्रसरता प्रति धन्यवाद दिन चाहन्छु ।’
प्रधानमन्त्री ओलीले प्रदेश २ का सांसदसँग भेटघाटपछि २ वटा मैथली र १ एउटा नेपाली भाषामा ट्वीट गरेका छन् ।
यसैबीच प्रदेश नं २ का सांसदहरुले ‘ प्रधानमन्त्रीसँगको भेटमा तराई मधेशको समृद्धिसँग प्रधानमन्त्री कार्यक्रम’ ल्याउन माग गरेका छन् ।
प्रदेशबाट संघीय संसद्मा प्रतिनिधित्व गर्ने सबै दलका सांसदहरुले प्रधानमन्त्री ओलीलाई भेटी देशको अर्थतन्त्रमा महत्वपूर्ण योगदान गर्दै आएको प्रदेश नं २ को सामाजिक र आर्थिक विकासका लागि प्राथमिकता दिन आग्रह गरे ।
शिक्षा, स्वास्थ्य, कृषि र उद्योगको विकास, बाढी पहिरो नियन्त्रण, सडक, खानेपानी, नदी तटबन्ध तथा व्यवस्थापन, चुरे संरक्षणका विषयमा पनि आगामी नीति, कार्यक्रम र बजेटले सम्बोधन गर्नुपर्ने माग राखेको प्रतिनिधि मण्डलका सदस्य एवं राष्ट्रिय जनता पार्टीका नेता लक्ष्मणलाल कर्णले जानकारी दिए ।
नेकपा एमालेका सांसद सुमनराज प्याकुरेलका अनुसार प्रधानमन्त्री ओलीले मागहरु जायज, आवश्यक भएको र आफू तराई मधेससहित सिङ्गो मुलुकको विकासका लागि गम्भीर रहेको बताउँदै सुझाव कार्यान्वयन गर्ने विश्वास दिएका छन् ।
प्रतिक्रिया दिनुहोस !
