हेटौंडा : प्रदेशसभा ३ को बर्खे अधिवेशन मंगलबादेखि सुरु भएको छ । अधिवेशनको पहिलो बैठकमा आर्थिक मामिला तथा योजनामन्त्री कैलाश ढुंगेलले विनियोजन विधेयकका सिद्धान्त र प्राथमिकताका सम्बन्धममा (कर प्रस्तावबाहेक) प्रस्ताव टेबल गरेका छन् ।
प्रदेशसभा सदस्य हरिशरण लामिछानेको असामयिक निधनपछि मंगलबारको बैठकमा पूर्वबजेटसम्बन्धी प्रस्ताव टेबल मात्र भएको हो । बैठक स्वर्गीय लामिछानेप्रति श्रद्धाञ्जली व्यक्त गर्दै सकिएको थियो । त्यसअघि प्रदेश प्रमुख कार्यालयबाट आएको अधिवेशन आह्वान र विधेयक प्रमाणीकरणसम्बन्धी पत्र सभामुख सानुकुमार श्रेष्ठले पढेर सुनाएका थिए । बैठक बुधबार बिहान ११ बजे बस्नेगरी स्थगन भएको छ । बुधबारको बैठकमा पनि प्रदेशभा सदस्य लामिछानेको निधनप्रति शोक प्रस्ताव पारित गर्ने मात्र कार्यसूची रहेको छ । बिहीबार बस्ने बैठकमा विनियोजन विधेयकका सिद्धान्त र प्राथमिकताका सम्बन्धममा टेबुल भएको प्रस्तावमा छलफल सुरु हुने सभामुख सानुकुमार श्रेष्ठले जानकारी दिए ।
पर्यटन, कृषि र जलविद्युत्मा प्राथमिकता
विनियोजन विधेयकका सिद्धान्त र प्राथमिकताको प्रस्तावमा पर्यटन, कृषि र जलविद्युत् छलफलको प्रमुख प्राथमिकतामा रहेको आर्थिक मामिला तथा योजनामन्त्री कैलाश ढुंगेलले बताए । ‘हामीले प्रदेशसभाबाट बजेटको प्राथमिकताक्रमलाई टुंगो लगाउँछौं’, उनले भने, ‘मन्त्रालयको तर्फबाट पर्यटन, कृषि र जलविद्युत्लाई पहिलो प्राथमिकता दिएर बजेट बनाउन प्रस्ताव गरेका छौं ।’
प्रदेश सरकारले असार १ गते प्रत्येक वर्षको बजेट ल्याउनुपर्ने संवैधानिक व्यवस्थाअनुसार प्रदेश ३ को बजेट अधिवेशन जेठ १ गतेबाट सुरु भएको हो । आर्थिक वर्ष ०७५÷७६ को बजेट ल्याउन प्रदेश ३ को आर्थिक मामिला तथा योजना मन्त्रालयले १३ जिल्लाका स्थानीय तहसम्म पुगेर छलफल गरिरहेको मन्त्रालयका सचिव वसन्त अधिकारीले बताए ।
केन्द्रबाट कुन-कुन र के-कति योजना हस्तान्तरण हुने भन्ने यकिन नभएका कारण प्रदेशको आगामी वर्षको बजेट कति हुने भन्ने निश्चित नभएको उनले जानकारी दिए । ‘प्रदेश ३ को पहिलो पूर्ण बजेट न्यूनतम २५ अर्बदेखि ५० अर्बसम्म जान सक्छ’, सचिव अधिकारीले भने ।
प्रतिक्रिया दिनुहोस !
