विराटनगर ः झापा गाउँपालिका–७ की ७० वर्षीया दुर्गादेव सञ्जेल बिहीबार मोरङ जिल्ला अदालत परिसरमा डाँको छाडेर रोइरहेकी थिइन् । साढे ३३ किलो सुन तस्करी र मोरङ उर्लाबारीका सनम शाक्य हत्या प्रकरणमा थुनछेक बहस चलिरहँदा उनका आँखा ओभाएका छैनन् ।
जिल्ला न्यायाधीश नारायणप्रसाद शर्माको इजलासमा प्रतिवादीतर्फका कानुन व्यवसायीले बहस गरिरहेका छन् । बाहिर भने निलम्बित सइ बालकृष्ण सञ्जेलकी आमा दुर्गादेवीले आँसु थाम्न सकिरहेकी थिइनन् । उनी ७२ वर्षीय पति उमाकान्त, बुहारी (बालकृष्णकी पत्नी) कमला र ६ वर्षीय नातिसहित विराटनगर बसेको २५ दिन भइसक्यो । भनिन्, ‘मेरा छोरोमाथि ठूलो अन्याय गरियो ।’
छोरो पक्राउ परेको थाहा पाएपछि उनी घरमै बेहोस भएर ढलेकी थिइन् । प्रहरी हिरासतमा राखिएका बालकृष्णलाई भेट्न नदिइएपछि उनी जिल्ला प्रहरी कार्यालय मोरङको गेटमै दोस्रो पटक बेहोस भएर ढलिन् । भनिन्, ‘हिरासतमा भएको छोरोलाई भेट्न पनि पाइएन । हामीले अदालत ल्याएपछि मात्रै छोरोको अनुहार देख्न पायौं ।’
बालकृष्णकी पत्नी कमला पनि रुँदै थिइन् । ‘मेरा पतिले धेरै राम्रा काम गरेका कारण प्रहरीका ठूला भनिएकाबाटै रिसइबी साँधेर फसाइयो’, उनले भनिन् । उनले विभिन्न नाममा आफूहरूलाई धम्कीसमेत आउने गरेको बताउँदै परिवारका सदस्य पनि असुरक्षित बनिरहेको गुनासो गरिन् ।
प्रतिवादी राजन थापालाई भेट्नासाथ उनका फुपूका छोरा मनोराज बस्नेतका आँखामा आँसु टिलपिलाए । त्रिभुवन अन्तर्राष्ट्रिय विमानस्थलका कर्मचारी थापा पनि आफूलाई फसाइएको बताइरहेका थिए । ‘दाजु बिहान–बेलुका गाईवस्तुको धन्दा गरेर दिउँसो कार्यालय जानुहुन्थ्यो’, बस्नेतले भने, ‘अवैध रूपमा पैसा कमाएको भए तडकभडक देखाइहाल्नु हुन्थ्यो नि !’
सञ्जेल परिवार र बस्नेत मात्र होइन, सुन तस्करी र सनम हत्याका अभियुक्तका आफन्तको उपस्थिति एक सातादेखि अदालत परिसरमा बाक्लिएको छ । उनीहरूबीच रुवाबासी चलिरहेको छ । अभियुक्तलाई भेट्न र देख्नासाथ आफन्तका आँसु थामिँदैनन् । आफन्तलाई देखेपछि अभियुक्त पनि आँसु खसाल्छन् । अभियुक्तलाई अदालत उपस्थित गराउनासाथ प्रत्येक दिन बिहान १० देखि बहस चलुन्जेल साँझ ५ बजेसम्म आफन्त इजलासबाहिर बसिरहेका हुन्छन् ।
अदालतमा वैशाख १९ गते मुद्दा दायर भएपछि बहस हुँदा इजलास साँघुरो भएको छ । ६३ जनाविरुद्ध दायर गरिएको मुद्दाको थुनछेक बहस भइरहँदा भीडभाड बढेपछि इजलास साँघुरो भएको हो । पक्राउ परेका ३० अभियुक्त र उनीहरूका तर्फबाट बहस गर्ने कानुन व्यवसायीले नै अदालत भरिने गरेको छ ।
इजलासभित्र उभिएर बहस सुन्न पाइन्न । ढोकाछेउ प्रहरी बसेका हुन्छन् । बसह सुरु भएपछि प्रतिवादीका आफन्त र मुद्दामा चासो राख्नेहरू पुग्छन् । इजलासभित्र बस्ने ठाउँ नभएका कारण उनीहरूलाई प्रहरीले बाटोमै रोक्ने गरेको छ । साँघुरो इजलासमा अभियुक्तका आफन्त पालो गरेर बहस सुन्न बस्छन् भने अधिकांश बाहिरै रहन्छन् ।
प्रतिक्रिया दिनुहोस !
