धरान : अन्नपूर्ण पोस्ट् इन्टरनेसनल कर्पोरेट ब्याडमिन्टन प्रतियोगिताको प्रदेश १ स्तरीय छनोट आइतबारदेखि धरानमा सुरु हुँदैछ । अन्नपूर्ण मिडिया नेटवर्कको आयोजनामा हुने प्रतियोगिताको खेल संघीय प्रहरी एकाइ कार्यालय धरानको कभर्डहलमा हुनेछ । प्रतियोगिताको उद्घाटन प्रदेश १ का सभामुख प्रदीपकुमार भण्डारीले गर्नेछन् ।
प्रतियोगिताका लागि प्रदेश १ का विभिन्न १० जिल्लाका ८० खेलाडीले सहभागिता जनाउने प्रतियोगिताका स्थानीय संयोजक रकम माबुहाङ लिम्बूले जानकारी दिए । ६ विधामा खेलाइने प्रतियोगितामा ६५ जना पुरुष र १५ जना महिला खेलाडी सहभागी हुने संयोजक लिम्बूले जानकारी दिए ।
प्रतियोगितामा यू-१९ पुरुष, यू-१९ महिला, पुरुष सिंगल, महिला सिंगल, पुरुष डबल्स र मिक्स डबल गरी ६ विधामा खेलाडीले प्रतिस्पर्धा गर्ने प्रतियोगिताका मुख्य रेफ्री उदय अर्यालले बताए ।
यू-१९ विधामा पुरुष सिंगलतर्फ २५ जना र महिलामा आठजना खेलाडीले प्रतिस्पर्धा गर्दैछन् । महिला सिंगलतर्फ पनि आठजनाले प्रतिस्पर्धा गर्नेछन् । मिक्स डबलतर्फ १० जोडीले सहभागिता जनाउनेछन् । पुरुष डबलतर्फ २२ जोडी तथा पुरुष सिंगलमा २० खेलाडीले प्रतिस्पर्धा गर्नेछन् ।
प्रदेश १ को सुनसरी, मोरङ, झापा, इलाम, धनकुटा, उदयपुर, तेह्रथुम, संखुवासभा, खोटाङ र भोजपुरबाट खेलाडीहरू प्रतियोगितामा सहभागी हुन धरान आइसकेका छन् । सातै प्रदेशमा पहिलो चरणको छनोट प्रतियोगिताका विजेता र उपविजेतालाई काठमाडौंमा हुने अन्तिम चरणको प्रतिस्पर्धामा सहभागी गराइने अन्नपूर्ण मिडिया नेटवर्कका प्रदेश १ का एरिया इन्चार्ज नरेश दाहालले बताए । प्रतियोगिताको अन्तिम चरणको खेलमा विभिन्न १२ देशका खेलाडीले सहभागिता जनाउनेछन् ।
प्रतिक्रिया दिनुहोस !
