भोजपुर : जिल्लामा अदुवाखेती विस्तार र व्यावसायीकरणको सम्भावनालाई ध्यानमा राख्दै सरकारी लगानी बढाइएको छ । बजार भाउ क्रमिक खस्कँदै गएसँगै ओरालो लागेको अदुवाखेतीलाई बढावा दिन प्रधानमन्त्री कृषि आधुनिकीकरण परियोजना अन्तर्गत हतुवागढी र पौवादुम्मा गाउँपालिकामा अदुवाखेती गरिने ब्लकको काम थालनी गरिएको कृषि कार्यालयले जनाएको छ ।
हतुवागढी गाउँपालिकाको दुई हजार आठ सय रोपनी क्षेत्रफलमा अदुवा ब्लक निर्माण गर्न झन्डै ५० लाख बराबर अनुदान छ । अदुवाखेती गरेबापत कृषकलाई प्रोत्साहन गर्न अनुदान दिइएको जिल्ला कृषि विकास कार्यालयका प्राविधिक सहायक युगमणि भट्टराईले बताए । हतुवागढी गाउँपालिकाकै सिन्द्राङमा कृषकले उत्पादन गरेको अदुवा सुरक्षित भण्डारणका लागि १५ लाख रुपैयाँ सहयोग गरेर गोदाम घर बनाइएको छ ।
यस्तै पौवादुम्मा गाउँपालिकामा यस वर्ष अदुवाको ब्लक स्थापना गर्न १७ लाख रकम छुट्याइएको छ । त्यसबाहेक साविकका सानोदुम्मा, याकु र हसनपुरलगायत स्थानमा करिब दुई सय रोपनी क्षेत्रफललाई अदुवाको पकेट क्षेत्र घोषणा गरी धमाधम काम भइरहेका छन् ।
जिल्लाभर हाल कुल तीन हजार हेक्टर क्षेत्रफलमा अदुवाखेती लगाइने गरिएको कार्यालयको तथ्यांक छ । जिल्लामा बर्सेनि झन्डै दुई हजार मेट्रिक टन अदुवा उत्पादन हुने गरेको छ । कृषकले आफ्नो मेहनतअनुसार प्रतिरोपनी चारदेखि पाँच सय किलो अदुवा उत्पादन गरिरहेको प्राविधिक भट्टराईले जानकारी दिए । समग्रमा जिल्लामा अदुवाको उत्पादन राम्रो रहेको प्राविधीकहरू बताउँछन् । उनका अनुसार गुणस्तरीय अदुवा उत्पादन र बजारीकरणका लागि सुठो बनाउने, सोलार ड्रायर र प्याकेजिङमा पनि सरकारी लगानी बढाइएको छ ।
प्रतिक्रिया दिनुहोस !
