तुलसीपुर : दाङको शान्तिनगरमा पाँच दिनदेखि फैलिएको झाडापखालाका बिरामीमा डेंगुको लक्षण देखिएको छ । शान्तिनगर स्वास्थ्यचौकीले उपचारका लागि रिफर गरेका दुई जना बिरामीमा डेंगुको संक्रमण देखिएको हो । बिरामीमा डेंगुको लक्षण देखिएपछि इपिडिमियोलोजी तथा रोग नियन्त्रण महाशाखाको टोलीले झाडापखाला लागेका बिरामीको नमुना बोकेर काठमाडौं फर्किएको छ ।
इपिडिमियोलोजी तथा रोग नियन्त्रण महाशाखाका मेडिकल टेक्नोलोजिस्ट धनप्रसाद पौडेलले बिरामीमा डेंगुको लक्षण देखिएको बताए । यसको पुष्टि गर्न थप नमुना लगिएको र बिहीबारसम्म रिपोर्ट आउने उनले बताए । डेंगु भए÷नभएकोबारे परीक्षण गरेपछि मात्रै भन्न सकिने भन्दै अहिले यसै भन्न नसकिने अवस्था रहेको जानकारी दिए । डेंगु हो वा होइन भन्नेबारे नमुना रगत जाँचका लागि काठमाडौं पठाइएको पौडेलले जानकारी दिए ।
दाङ आएको महाशाखाको टोली मंगलबार प्रभावित क्षेत्रको अवस्था बुझेर बिरामीको नमुना लिएर फर्किएको जिल्ला जनस्वास्थ्य कार्यालय दाङका प्रमुख घनश्याम पोखरेलले बताए । शान्तिनगरका सुकमाया विक र शोभा विकमा यस्तो लक्षण देखा परेको जनाइएको छ । तुलसीपुरको सिटी हस्पिटलमा उपचार गराइरहेका दुवै बिरामीमा यस्तो लक्षण देखा परेको थियो । झाडापखालाको अवस्था डेंगुको संक्रमण कसरी भयो भन्नेबारे भने बहस देखिएको छ ।
सामान्य बन्दै झाडापखाला
झाडापखाला पूर्णरूपमा नियन्त्रणमा आउन नसके पनि सामान्य अवस्थातर्फ गइरहेको छ । ‘शुक्रबारदेखि फैलिएको झाडापखालाका बिरामी मंगलबारसम्म पनि स्वास्थ्यचौकी जाने क्रम रोकिएको छैन’, गाउँपालिकाका स्वास्थ्य शाखा प्रमुख हरि पुनले भने, ‘अवस्था सामान्यतर्फ उन्मुख छ ।’
शान्तिनगर गाउँपालिका वडा नम्बर ३ र ४ का विभिन्न स्थानमा फैलिएको झाडापखाला पिउने पानीको कारण भएको प्रमाणित भइसकेका छ । हालसम्म झाडापखालाका बिरामीको संख्या एक हजार ६ सय ३१ पुगेको छ । पाँच दिनमा एक हजार ६ सय ३१ जना बिरामीको उपचार गरिएको पुनले बताए । एक हजार एक सय १४ महिला र पाँच सय १७ पुरुष बिरामी भएका छन् ।
अझै खोलिएन खानेपानीको पाइप
झाडापखाला फैलिएको क्षेत्रमा विगतदेखि पानी खुवाउँदै आएको माइली पानी खानेपानी संस्थाले मंगलबारसम्म पनि धारामा पानी वितरण गर्न सकेको छैन । पानीको मुहान र धारालाई पूर्णरूपमा सरसफाइ र शुद्धीकरण गर्ने कार्य जारी रहेकाले पानी वितरण गर्न केही दिन लाग्ने अध्यक्ष माधव बस्यालले बताए । पानीको समस्या भएपछि शान्तिनगरमा तुलसीपुर उपमहानगरपालिका र तुलसीपुर खानेपानी संस्थाले ट्यांकरमार्फत पानी वितरण गरिरहेको छ । पातेटाकुरा, गाहाटोल, एकली, गिधनीयालगायत बस्तीमा प्रत्येक घरमा दुई गाग्री पानी वितरण गरिएको प्रहरी चौकी चिराघाटले जनाएको छ ।
प्रतिक्रिया दिनुहोस !
