पोखरा : आगामी आर्थिक वर्षका लागि नेपाल सरकारले मंगलबार सार्वजनिक गरेको बजेटमा प्रदेश ४ का लागि उल्लेखनीय योजना परेका छैनन् । ७ प्रदेशमध्ये सबैभन्दा कम बजेट पनि प्रदेश ४ कै लागि छुट्टिएको छ ।
वित्तीय समानीकरणमा ६ अर्ब ७७ करोड र ससर्त अनुदानमा ६ अर्ब ५० करोड गरी १३ अर्ब २७ करोड रुपैयाँ प्रदेश ४ लाई छुट्टिएको छ । अर्थमन्त्री युवराज खतिवडाले बजेट सार्वजनिक गर्दा पोखरा अन्तर्राष्ट्रिय विमानस्थल, बूढीगण्डकी जलविद्युत् आयोजना, कालीगण्डकी करिडरजस्ता आयोजना निर्माण गर्ने उल्लेख गरे ।
पोखरामा विमानस्थल निर्माण भने यसअघि नै सुरु भइसकेको छ । बजेट वक्तव्यको ११९ नम्बर बुँदामा भने उक्त विमानस्थल निर्माण अगाडि बढाउने उल्लेख छ । गोरखामा निर्माण हुने बूढीगण्डकी जलविद्युत् परियोजनाको मुआब्जा वितरण पूरा गर्ने अर्थमन्त्रीले सुनाएका छन् ।
प्रधानमन्त्री केपी ओलीले बारम्बार उल्लेख गर्दै आएको रसुवा—काठमाडौं—पोखरा—लुम्बिनी रेलमार्ग बजेट वक्तव्यमा समेटिएको छ । त्यस हिसाबले प्रदेश ४ को राजधानी बजेटमा सम्बोधित देखिन्छ ।
पोखराको पर्यटनका लागि भनेरै खास योजना सरकारले बजेटमा ल्याएन । देशभरिकै पर्यटन क्षेत्रको विकासका लागि ५ अर्ब २० करोड ३४ लाख रुपैयाँ विनियोजन गरेको अर्थमन्त्रीले उल्लेख गरे । प्रदेश ४ को महŒवपूर्ण योजना मानिएको कालीगण्डकी करिडर बजेटमा परेको छ । उक्त करिडर कोरलादेखि त्रिवेणीसम्म विस्तार गर्ने बजेटमा उल्लेख छ । त्यसैले जल यातायातको सम्भाव्यता अध्ययन गर्ने बुँदामा गण्डकी नदी पनि बजेटले समेटेको छ ।
प्रत्येक प्रदेशमा कम्तीमा एक बहुउद्देश्यीय जलविद्युत् आयोजना निर्माणका लागि सम्भाव्यता अध्ययन गर्ने बताउँदै अर्थमन्त्री खतिवडाले बागलुङको उत्तरगंगा र कालीगण्डकी नदीमा त्यस्तो सम्भावना खोज्ने योजना ल्याएका छन् ।
अर्थ विश्लेषक आनन्दराज मुल्मी प्रदेश ४ को मानव विकास सूचांक अग्रस्थानमा भएको तर राजस्वमा खास योगदान दिन नसकेको हुँदा बजेट कम परेको हुन सक्ने बताउँछन् । समग्र बजेट संघीय प्रणालीप्रति प्रतिबद्धता जनाउने गरी आउन नसकेको पनि उनको टिप्पणी छ । ‘१६ खर्ब आउला भनेको बजेट त्यति आउन सकेन’, मुल्मीले भने, ‘राजस्वको स्रोत नभएकैले अर्थमन्त्रीले बजेटको आकार बढाउन सक्नुभएनजस्तो देखिन्छ ।’
प्रदेश ४ को १ मात्रै महानगरपालिका पोखरालाई अर्थमन्त्री खतिवडाले १ अर्ब ८१ करोड रुपैयाँ बजेट पाएको छ । प्रदेशमा ८५ स्थानीय तह छन् ।
प्रतिक्रिया दिनुहोस !
