काठमाडौं: काठमाडौं महानगरपालिकाले राष्ट्रिय सम्पदा धरहरा वरिपरिका संरचना हटाउन थालेको छ । महानगरले धरहरासँग जोडिएको रेष्टुरेन्ट, वरिपरिका टहरा, पसलहरु धमाधाम भत्काइरहेको छ ।
महानगरपालिका सुचना अधिकृत वसन्त आचार्यले धरहराक्षेत्रमा अतिक्रमित पसल, रेष्टुरेन्ट र टहरा लगायतका संरचना हटाउने काम थालिएको बताए ।
महानगरलाई वरिपरिका संरचना हटाउन सूचना जारी गरेको थियो । आफैँ नभत्काए महानगरले नै भत्काउने र त्यसबाट हुने क्षतिको जिम्मेवार स्वयम सञ्चालक हुनुपर्ने पत्रमा उल्लेख गरिएको छ । महानगरका सार्वजनिक निजी साझेदारी एकाई प्रमुख महेश काफ्लेले उक्त सूचना जारी गरेका थिए ।
सम्बन्धित: धरहरा क्षेत्रका पसल र रेस्टुरेन्टमा डोजर चल्यो (फोटो फिचर)
महानगरका सूचना अधिकृत आचार्यले धरहराको वरिपरिको अतिक्रमित संरचना भत्काउने काम महानगरले गरेपछि निर्माणको काम पुनर्निर्माण प्राधिकरणबाट हुने बताए । ती संरचनाले धरहराको वरिपरिको सौन्दर्यमा असर परेको महानगरले जनाएको छ ।
यसैगरी धरहरा वरिपरिको क्षेत्रमा नयाँ संरचना निर्माणमा समेत रोक लगाइएको छ । धरहरा नजिक गुठी संस्थानले बनाइरहेको संरचनाको निर्माण समेत रोकिएको छ ।
उता राष्ट्रिय पुनर्निर्माण प्राधिकरणले धरहरा निर्माणका लागि बोलपत्र समेत आह्वान गरिसकेको छ । प्राधिकरणका प्रवक्ता यमलाल भुसालले टेण्डर खोलेर निर्माण प्रक्रिया थालनी गरेको बताए ।
नेपाल सरकारको नीति तथा कार्यक्रम र बजेटमा धरहराको निर्माण तीन वर्षभित्र पुरा गर्ने घोषणा गरिएको छ । यसअघि आश्वासन दिएर नेपाल टेलिकमले धरहरा निर्माणबाट हात झिकेको थियो ।
भत्काइँदै संरचना
प्रतिक्रिया दिनुहोस !
