काठमाडौं : प्रमुख सत्तारुढ नेपाली कांग्रेस र प्रमुख प्रतिपक्षी नेकपा एमालेबीच बैठक सुरु भएको छ ।
भक्तपुरको बालकोटस्थित एमाले अध्यक्ष केपी शर्मा ओलीको निवासमा शुक्रबार दुई दलका नेताहरुबीच वार्ता सुरु भएको हो । बैठकमा सहभागी हुन प्रधानमन्त्री शेरबहादुर देउवा साँझ बालकोट पुगेका थिए । देउवाअघि कांग्रेस उपसभापति पूर्णबहादुर खड्का, महामन्त्री गगनकुमार थापा र सञ्चारमन्त्री ज्ञानेन्द्रबहादुर कार्की बालकोट पुगेका थिए ।
बैठकमा एमालेका तर्फबाट महासचिव शंकर पोखरेल र उपमहासचिव प्रदीप ज्ञवाली सहभागी छन् ।
अमेरिकी सहायता परियोजना एमसीसी संसदबाट अनुमोदन गर्न प्रधानमन्त्री देउवाले राजनीतिक दौडधुप तीव्र पारेका छन् ।
सत्ता गठबन्धन दल नेकपा माओवादी केन्द्र र नेकपा एकीकृत समाजवादी अनुमोदन गराउन कुनै हिसाबले पनि सहयोग गर्न तयार नभएपछि एमालेको साथ खोज्दै कांग्रेस नेताहरु पुन: बालुवाटार पुगेका हुन् ।
यसअघि देउवाले आज प्रचण्ड र माधव नेपालसँग एमसीसी अनुमोदनबारे छुट्टाछुट्टै छलफल गरेका थिए । हिजोमात्रै देउवाले एमालेसँग दुई चरणमा छलफल गरेका थिए ।
प्रतिक्रिया दिनुहोस !
