विराटनगर : प्रदेश १ सरकारले आम्दानीको दर्बिलो स्रोत पर्यटनलाई बनाउने उद्देश्यसहित यो क्षेत्रको विकासलाई उच्च प्राथमिकतामा राखेको छ । आउँदो बजेटमार्फत सरकारले पर्यटन क्षेत्रको पूर्वाधार विकाससहितका कार्यक्रमका लागि ४ अर्ब रुपैयाँभन्दा बढीको सिलिङ तोकिएको छ । यहीअनुसार नीति तथा कार्यक्रम तय गर्न उद्योग, पर्यटन, वन तथा वातावरण मन्त्रालयलाई निर्देशन दिइएको छ ।
प्रदेशका १४ वटै जिल्लामा पर्यटनको ठूलो सम्भावना रहेकाले ती क्षेत्रको प्रचार गरी आम्दानीको दीर्घकालीन स्रोतका रूपमा विकास गर्ने तयारीस्वरूप पर्यटनलाई बढी बजेट छुट्याइएको पर्यटनमन्त्री जगदीशप्रसाद कुसियतले जानकारी दिए । ‘हाम्रो प्रदेश तराईबाट हिमालसम्म जोडिएको मिनी नेपालकै रूपमा चर्चित छ’, मन्त्री कुसियतले भने, ‘त्यसैले सरकारले सम्भाव्य पर्यटकीय गन्तव्यमा धेरैभन्दा धेरै पर्यटक पु¥याएर आम्दानीको स्रोत बढाउन पर्यटनलाई प्राथमिकतामा राखेको हो ।’ प्रदेश सरकारको आउँदो बजेटमा पर्यटकीय क्षेत्रलाई छुट्याइने बजेटले जनआकांक्षा र सरकारको भावी योजना मुखरित हुने उनको भनाइ छ ।
यो मन्त्रालयले ५ अर्ब ३६ करोड ४४ लाख बजेट सिलिङ प्राप्त गरेको छ, जसमध्ये ७४ प्रतिशतभन्दा धेरै पर्यटनलाई नै छुट्याइएको मन्त्रालयका सचिव किशोरचन्द्र गौतमको भनाइ छ । भने, ‘आम्दानीको स्रोतसमेत अधिक भएकाले सरकारले पर्यटनलाई प्राथमिकता दिएको हो ।’ मन्त्रालयले प्राप्त गरेको बजेट सिलिङभित्रै रहेर लोकप्रिय कार्यक्रम तयार भइरहेको उनले बताए ।
मन्त्रालयले हरेक स्थानीय तहमा पर्यटकीय क्षेत्र विकास गर्न ‘हाम्रो गाउँ, हाम्रा पाहुना सँगसँगै रमाऊन्, केचनाकवल–सगरमाथा ः पर्यटन प्रवद्र्धन, जातीय एवं बहुसांस्कृतिक संग्रहालय, प्रदेशस्तरीय पर्यटन बोर्ड गठनलाई प्राथमिकता दिएको छ । युवाद्वारा यात्रुमैत्री होस्टे, उडौं पहाड हेरौं हिमाल, ऐतिहासिक विराट दरबार क्षेत्रसहित ऐतिहासिक क्षेत्रको संरक्षण, प्रादेशिक पर्यटन महोत्सव, विराटनगर विमानस्थलको गुरुयोजना तयार गरी संघीय सरकारसँगको समन्वयमा र सहकार्यमा विस्तार र स्तरोन्नति गर्ने कार्यक्रम बजेटमार्फत समेटिने भएको छ ।
‘अहिले नै प्रचारमा रहेका पर्यटकीय क्षेत्रलाई थप विकास गर्नेदेखि नयाँलाई प्रचार तथा प्रवद्र्धन गर्नेतर्फ सरकारको ध्यान छ’, सचिव गौतमले भने । धेरै आरोहण हिमाल प्रदेश १ मै पर्ने भएकाले पहाडी तथा हिमाली पदयात्राका कार्यक्रमलाई बढावा दिइने उनले बताए ।
सरकारका विज्ञ सोम अधिकारीले प्रदेश १ भारतका तीन राज्य सिक्किम, पश्चिम बंगाल र बिहारसँग सिमाना जोडिएकाले यो क्षेत्रमा धार्मिक पर्यटक बढाउन सकिने बताए । भने, ‘हाम्रा धार्मिक क्षेत्रमा भारतीय पर्यटक भिœयाउन सकिन्छ ।’ प्रदेश सकारले असार १ गते बजेट ल्याउन नीति तथा कार्यक्रम बनाइरहेको छ ।
प्रधानमन्त्री आउँदै
प्रदेशसभा बैठकलाई सम्बोधन गर्न प्रधानमन्त्री केपी ओली विराटनगर आउने तय भएको छ । बजेट अधिवेशनलाई सम्बोधन गर्न प्रधानमन्त्री ओली आउने तय भएको प्रदेश १ का सभामुख प्रदीपकुमार भण्डारीले जानकारी दिएका छन् । यसअघि पूर्वबजेट छलफलका लागि तीन दिन बैठक चलेको थियो, अर्को बैठक शुक्रबार बस्दै छ । प्रधानमन्त्री ओली भने शनिबारको बैठकलाई सम्बोधन गर्न आउने भएका हुन् ।
प्रदेश १ पर्यटन हब : मुख्यमन्त्री
धरान : प्रदेश १ लाई पर्यटन ‘हब’का रूपमा विकास गरिने भएको छ । यसका लागि प्रदेश सरकारसहित पर्यटन व्यवसायी लागिपरेका छन् । यही उद्देश्यसहित पर्यटन बोर्डको आयोजनामा तीनदिने कार्यक्रम बिहीबार सुरु भएको छ । कार्यक्रम उद्घाटन समारोहमा मुख्यमन्त्री शेरधन राईले भने, ‘यो प्रदेशलाई पर्यटन हब बनाउन प्रदेश सरकारले तयारी थालिसकेको छ । आन्तरिक तथा बाह्य पर्यटक भिœयाउन विराटनगर विमानस्थललाई अन्तर्राष्ट्रिय विमानस्थलका रूपमा विकास गरिनेछ ।’ उनले निजी क्षेत्रको सहयोगबिना पर्यटन प्रवद्र्धन सम्भव नभएको उल्लेख गर्दै यसमा लगानी गर्न आह्वानसमेत गरे । प्रदेश १ का सभामुख प्रदीप भण्डारीले पनि प्रदेश १ पर्यटनका हिसाबले ‘सुनको खानीजस्तै’ भएको बताए । भने, ‘पर्यटकीय क्षेत्रको प्रचार गरी विदेशी पर्यटकलाई सहज रूपमा भिœयाउने कार्ययोजना बनाइनुपर्छ ।’
प्रदेश १ का पर्यटनमन्त्री जगदीश कुसियतले प्रदेशका प्रमुख पर्यटकीय क्षेत्रको सूचना बोर्ड राखेर पर्यटकको भम्रणलाई सहज बनाउने तयारी रहेको बताए । शनिबारसम्म चल्ने ‘वेस्ट टुरिजम मार्ट २०१८’ मा नेपाल, भारत र भुटानका पर्यटन व्यवसायीबीच छलफल हुने धरानका पर्यटन व्यवसायी वासु बरालले बताए ।
प्रतिक्रिया दिनुहोस !
