फिदिम : पाँचथरको याङवरक र ताप्लेजुङको सिरिजंघा गाउँपालिका जोड्ने काबेली नदीमाथिकोे मोटरेबल पुल जोखिममा छ । काबेली बीवान जलविद्युत् आयोजनाले नदीमाथिको इमा–काबेली मोटरेबल ट्रस्ट पुल जोखिममा पर्ने गरी पूर्वाधार निर्माण गरेको हो ।
विद्युत् आयोजनाको हेडवर्क साइडदेखि पाइप लाइन विस्तार गर्दा पुललाई जोखिममा परिएको हो । पाइप लाइन विस्तारका लागि मोटरेबल पुलको जग वरिपरि खाल्डो खनिएको छ । मोटरेबल पुलको आसपास बालुवासमेत निकाल्न नपाउने कानुनी प्रावधान छ । पुल वरिपरि कुनै पनि किसिमको निर्माणका कार्य गर्न नपाउने व्यवस्था भए पनि जलविद्युत् आयोजनाले पुलको जग वरिपरि नै पूर्वाधार निर्माणको काम गरेको हो । पुलको पाँचथरतर्फको दायाँबायाँ खण्डमा ठुल्ठूला खाल्डा पारिएका छन् । पुलको जग वरिपरि खनेर आयोजनाका लागि पाइलाइन विस्तार गरिएको हो । पुलमाथि माटोले भरिएको छ । सडकबाट बगेर गएको भेल सोझै पुलमा गएर जमेको छ । पुलमा माटो र हिलो जमेका कारण पुल नै हिलाम्मे सडकजस्तो देखिन्छ ।
विद्युत् आयोजनाले पाइपलाइन विस्तारका लागि पुल वरिपरि खाल्डा पारे पनि अहिले खाल्डा पुरेर पुल सञ्चालनमा ल्याइएको याङवरक गाउँपालिकाका अध्यक्ष लेखनाथ घिमिरेले बताए । विद्युत् आयोजनाका लागि खनिएको खाल्डोमा पाइप लगाएर पुरेपछि पुल सञ्चालन भएको हो । ‘पाइप पुरेका कारण पुल अवरुद्ध भएको देखिँदैन’, घिमिरेले भने, ‘पुल जोखिममा छ÷छैन भन्ने प्राविधिक ज्ञान भएन, त्यसका लागि गाउँपालिकाले चासो दिनेछ ।’ खाल्डो पुरेपछि पुल जोखिमुक्त भएजस्तो देखिएको उनले बताए ।
पूर्वाञ्चल डिभिजन कार्यालय इलामअन्तर्गत पुल निर्माण गरिएको हो । नौ करोड लागतमा निर्माण गरिएको पुल ०६८ साउन १६ गते उद्घाटन गरिएको थियो । पुल सञ्चालनमा आएपछि पाँचथरसँग ताप्लेजुको पूर्वीखण्डका दुई गाउँपालिकाबीच यातायातको सोझो सम्पर्क भएको थियो ।
सडक डिभिजन कार्यालयले जोखिममा परेको पुलबारे अहिलेसम्म चासो दिएको छैन । पुलबारे कसैले चासो नराख्दा पुल नै जोखिममा पर्ने गरी विद्युत् आयोजना निर्माणको काम अन्तिम चरणमा पुगेको छ । पुल वरिपरि खाल्डा पारेर विद्युत् आयोजनाले पूर्वाधार निर्माण गरे पनि पुललाई असार नपारिएको काबेली बी वान जलविद्युत् आयोजनाका सिभिल हाइड्रोपावर इन्जिनियर माधव भुर्तेलले जानकारी दिए । ‘पुललाई सपोर्ट हुनेगरी पूर्वाधार निर्माण गरेका छौं’, भुर्तेलले भने, ‘जलविद्युत् आयोजना निर्माणका कारण पुल जोखिममा प¥यो भन्न मिल्दैन ।’
प्रतिक्रिया दिनुहोस !
