मोन्टेभिडियो : फुटबल खेलको महाकुम्भ मानिने विश्वकप सुरु हुन अब एक दिनमात्र बाँकी छ । बिहीबारदेखि रुसमा सुरु हुने विश्वकपमा दक्षिण अमेरिकी राष्ट्र उरुग्वेको ध्यान भने आफ्ना स्टार खेलाडी लुइस स्वारेजमा केन्द्रित हुनेछ । मैदानमा स्वारेजको प्रदर्शन र उनको उग्र व्यवहारका कारण पनि । चार वर्षअघि ब्राजिलमा भएको विश्वकपमा इटालीका डिफेन्डर जर्जियो चिलिनीलाई मैदानमै टोकेपछि विश्वकपबाट बाहिरिएका स्वारेजलाई नियन्त्रण राख्न यसपटक उरुग्वेले हरसम्भव उपाय अवलम्बन गर्नेछ ।
स्वारेज आफैंले भने चार वर्षअघिको तुलनामा अहिले आफूमा धेरै परिवर्तन आइसकेको बताएका छन् । उनले ब्राजिलको जस्तो घटना अब आफूबाट नदोहोरिने प्रतिबद्धता व्यक्त गर्दै आफ्ना समर्थकलाई आश्वस्त पारेका छन् । ‘ब्राजिल विश्वकपमा जे भयो त्यो मेरो गल्ती थियो । मेरो गल्तीले देशले पनि ठूलै मूल्य चुकाउनु पर्यो । अहिले म बदलिइसकेको छु । विश्वकपमा राम्रो छवि देखाउने प्रयास गर्नेछु’, स्वारेजले भनेका छन्, ‘अब मबाट पुरानो गल्ती दोहोरिँदैन ।’
स्वारेज उरुग्वेका लागि विश्वकपमा सर्वाधिक गोल गर्ने खेलाडी पनि हुन् । विपक्षी खेलाडीलाई टोकेपछि स्वारेजमाथि नौ खेलको प्रतिबन्ध लगाइएको थियो । फिफाको अनुशासन समितिले उनीमाथि प्रतिबन्ध लगाउने निर्णय गरेको थियो । स्वारेज प्रतिबन्धमा परेपछि दुई पटकको विश्वकप विजेता उरुग्वे प्रिक्वार्टरफाइनलबाटै बाहिरिएको थियो । अन्तिम १६ टोलीबीचको भिडन्तमा कोलम्बियाले उरुग्वेलाई पराजित गरेको थियो ।
विश्वकपको अघिल्लो संस्करणमा प्लेअफबाट स्थान सुरक्षित गरेको उरुग्वे यस पटक भने पहिलो चरणबाटै छनोट भएको हो । उरुग्वे ब्राजिलपछि दोस्रो स्थानमा रहँदै १५औं पटक विश्वकपमा छनोट भएको हो । सन् १९३० मा आफ्नै घरेलु मैदानमा विश्वकपको पहिलो संस्करण जितेको उरुग्वेले हालसम्म दुई पटक विश्वकप चुमेको छ ।
प्रतिक्रिया दिनुहोस !
