तानसेन : अनियमित विद्युत् कटौतीले हैरान परेपछि तानसेनवासीले जिल्ला प्रशासनसँग गुहार मागेका छन् । १२ घण्टामा ७१ पटक विद्युत् काटिएको भन्दै स्थानीयले जिल्ला प्रशासन र विद्युत् वितरण केन्द्रमा पुगी विद्युत् नियमित गर्न आग्रह गरेका हुन् । ‘दिनभर गनेरै बसें । ५७ पटक बगयो’, तानसेनका उपभोक्ता अजय कर्माचार्यले भने ।
पटक–पटक लाइन काटिरहँदा फ्रिज, टेलिभिजन, वासिङ मेसिनलगायत विद्युतीय सामान बिग्रिएको उपभोक्ता मधुदयाल सैजुले बताए । रिडी हाइड्रोपावर, बुटवल पावर कम्पनीबाट उत्पादित विद्युत् तानसेन हुँदै राष्ट्रिय प्रसारमा जोडिएको छ । तर, तानसेनमा विद्युत् आपूर्ति सहज हुन सकेको छैन । नीतिगत व्यवस्था गरेर विद्युत् आपूर्ति गर्न स्थानीयले प्रमुख जिल्ला अधिकारी विष्णुप्रसाद ढकाल र पाल्पा विद्युत्का प्रमुख इन्जिनियर रामु श्रेष्ठलाई आग्रह गरेका छन् । पाल्पाबाट गुल्मीलाई विद्युत् आपूर्ति गरिएकाले सो जिल्लामा विद्युत् अनियमित भएको छ ।
लोडसेडिङका बेलाजस्तै विद्युत् अवरुद्ध हुँदा उद्योग, व्यवसाय प्रभावित भएका छन् । साना उद्योग सञ्चालनमा कठिनाइ आएको उद्योगीको भनाइ छ । तानसेनमा खानेपानी व्यवस्थापनमा समेत कठिन भएको छ । बुटवलबाट पाल्पा जंगल हुँदै विद्युत् आउने भएकाले सामान्य वर्षा र हावा लाग्नासाथ विद्युत् अवरुद्ध हुने विद्युत् प्राधिकरण पाल्पा शाखाका प्रमुख रामु श्रेष्ठले बताए । ‘जंगलको बाटो छाडेर तानसेन बुटवल सडकखण्ड हुँदै लाइनको रुट परिवर्तन गर्ने कार्य अन्तिम चरणमा पुगेको छ । आगामी वर्षदेखि समस्या कम हुन्छ’, उनले भने ।
प्रतिक्रिया दिनुहोस !
