काठमाडौं: स्थानीय तह कर्मचारी युनियन नेपालका अध्यक्ष एवम् पोखरा लेखनाथ महानगरपालिकाका वरिष्ठ अधिकृत ओमराज पौडेल शनिबारदेखि बेपत्ता भएका छन् । पौडेल मर्निङ वाकको सिलसिलामा घरबाट निस्किएदेखि फर्किएका छैनन् ।
युनियनले महानगरकै कारण पौडेल तनावमा रहेको र त्यही कारण समस्या भएको आरोप लगाएको छ । ‘महानगरपालिकाले फरक विचारधारा भएकै कारण राजनीतिक आस्थाकै कारण कर्मचारी पौडेललाई सरुवा गर्दिन्छु भन्दै चरित्र हत्यासम्मको मानवीय सम्वेदनामाथि प्रहार गरेको हो’, युनियनका महासचिव रामप्रसाद पौडेलद्धारा आइतबार जारी विज्ञप्तिमा उल्लेख छ ।
महानगरको प्रमुख एवम् व्यवस्थापन पक्षबाट घटुवा गर्ने, पदीय हिसाबको मान मर्दन, विनाकारण अपायक सरुवा गर्ने र लाञ्छना लगाउने गरेको कुरा जानकारीमा आएको विज्ञप्तीमा जनाइएको छ।
विज्ञप्तिमा पछिल्लो समय स्थानीय तहमा जनप्रतिनिधि आएपछि फरक विचार राख्ने कर्मचारीलाई पेशागत र मानवीय संवेदनामाथि प्रहार हुन थालेको भन्दै विरोध जनाएको छ । विज्ञप्तिमा बेपत्ता पौडेलको शीघ्र खोजी गरी सत्यतथ्य पत्ता लगाई बेपत्ता हुन बाध्य बनाउने माथि कारबाही गर्न माग गरिएको छ ।
पौडेल हराएकै दिन बिहान पोखराको महेन्द्रपुलबाट एक व्यक्तिले सेती नदीमा हामफालेका थिए । हुलिया खुल्न नसेकका ती व्यक्तिको पनि अवस्था अज्ञात छ ।
प्रतिक्रिया दिनुहोस !
