सुशीला कार्की भन्छिन्ः सरकारले नटेरे ३० हजार ज्यान गुमाउन  तयार छन्

काठमाडौंः पूर्वप्रधानन्यायाधीश सुशीला कार्कीले केपी ओली नेतृत्वको वर्तमान सरकार शोषक र समान्ती बन्दै गएको अरोप लगाएकी छन् । जुम्लामा अनशनरत डा. गोविन्द केसीको माग र उनको स्वास्थ्य अवस्थाको जानकारी दिन ललितपुरमा आयोजित पत्रकार सम्मेलनमा उनले यस्तो कुरा बताएकी हुन् ।

‘गोविन्द केसीले आफ्नो स्वार्थको लागि आन्दोलन र अनसन बसेका होइनन् । उनको लडाइँ गरिबको स्वास्थ्य उपचारका लागि हो’, उनले भनिन्, ‘दुरदराजमा अस्पताल बनोस्, स्वास्थ्य सेवा सहज होस् भन्ने उहाँको उद्धेश्य हो । उनले राज्यको विद्रोह गरेका छैनन्, उनको माग नजायज होइन ।’

कार्कीले १४ पटकको अनसनबाट आाएको चिकित्सा शिक्षा विधेयक मेट्न वर्तमान सरकार शोषक र सामान्तीको लाइनमा गएको आरोप पनि लगाइन् ।  हिजो लोकतन्त्रका लागि लड्ने दलको सरकारले निषेधाज्ञा लागू गर्ने र बोल्न नपाइने कुरा गर्नु पञ्चायती व्यवस्थाकै व्यवहार गर्नु दुःखद भएको पनि बताइन् ।  

१५ हजारको बलिदानपछि अहिले लोकतन्त्र स्थापना भएको संविधानले नै शान्तिपूर्ण भेला हुन पाइने र आफ्ना विचार व्यक्त गर्न पाइने व्यवस्था गरेको उल्लेख गदै पूर्वप्रधानन्यायधीश कार्कीले भनिन् ‘न्याय हुँदा सडकमा आएर हो बोल्ने र विरोध गर्ने हिजो आजका सरकार चलाउने पनि त्यही गरेका हुन्, तर अहिले बोल्न र विरोध गर्न निषेध लगाउन खोजिएको छ ।’

‘माथेमा प्रतिवेदन लागू गर’ भन्ने केसीको माग सरकारले सम्वोधन नगरेको बरु त्यो प्रतिवेदन भारतले लागू गर्न तयार देखिएको बताइन्  । ‘सरकार कुरा राम्रो गर्दैछ तर व्यवहार चाहिँ सामान्ती देखियो त्यो राम्रो होइन’, उनले भनिन् ।

सरकार ठूलाबडालाई पोस्ने र तस्कारको नाइकेलाई संरक्षण गर्र्दै गए, अब ३० हजार जनाले ज्यान गुमाउन तयार हुने उनले बताइन्  । ‘हिजोको परिर्वतनका लागि लड्नेबाट गरिबले अहिले पनि केही पाउन सकेनन्, यो दुःखको कुरा हो ।  काग कराउने, पिना सुक्ने कुरा मात्रै भयो’, उनले भनिन् ।  
 
राष्ट्रको विकास गर्ने नेताले सबैभन्दा तल्लो तहको नेताको बारेमा सोच्न पनि उनले आग्रह गरिन् । ‘विकासको नाममा नाटक गरेर हुँदैन । रेल, पानी जहाजसम्मका कुरा मिडियामा मात्रै आएका छन् । तर, जनताले लाखौ खर्च गर्दा पनि उपचार नपाएर मरिरहेका छन्’,  उनले भनिन् ।

गंगामाया अनसनमै मरेमा राज्य दोषी

आफ्नो छोराको हत्यामा संलग्नलाई कारबाही माग गर्दै न्यायका लागि लडिरहेकी गंगामाया अधिकारीको अनसनमै मृत्यु भएमा राज्य दोषी हुने कार्कीले बताइन् । 

‘गंगा मायाको नाम लिँदा पनि म राति झस्कन्छु । श्रीमानको अनशनमै ज्यान गयो, छोरा पनि मारिए । एउटा छोरा वेपत्ता छन् । उनलाई घाँटी थिचेर सरकारले मार्नै खोज्दैछ’, उनले भनिन्, ‘राज्य मात्रै होइन, हामी सबैले मार्दैछौँ । उनी मरिन् भने नेपालको इतिहासमा कलंक हुन्छ ।’ 

तत्कालीन प्रधानमन्त्री भीमसेन थापालाई श्रीमतीको बारेमा अनेक अफवाह फैलाएर मर्न बाध्य बनाए जस्तै काम अहिले पनि भइरहेको उनले बताइन् । ‘भीमसेन थापालाई जसरी मर्न बाध्य पारियो । गंगामायासँग अवस्था पनि उस्तै छ’, उनले भनिन्, ‘यो व्यवस्था के व्यवस्था हो ? उनले प्रश्न गरिन्, ‘ ‘गंगामाया न्यायकी देवी हुन् । उनीमाथि ठूलै अन्याय भएको छ । नेताहरुले उनीसँग माफ माग्नुपर्छ ।’