रूख कटान नहुँदा महाविद्यालय निर्माण प्रभावित
![रूख कटान नहुँदा महाविद्यालय निर्माण प्रभावित](https://annapurnapost.prixacdn.net/media/albums/dormani_hetauda_talks_20180715034520_e0qZHlWCXF.png)
हेटौंडा : नेपाल-भारत सरकारको दुई दशकको प्रयासपछि हेटौंडा-७ मा बन्न लागेको बहुप्राविधिक महाविद्यालय निर्माण रूख कटना नहुँदा प्रभावित भएको छ । भारत सरकारले एक वर्षअघि महाविद्यालय निर्माणको टेन्डर निकालेको थियो । ३८ करोड ५० लाख भारतीय रुपैयाँमा निर्माण सम्पन्न गर्ने गरी भारत सरकारले ६ महिनाअघि टेण्डरमार्फत निर्माण कम्पनी पनि छनोट गरिसकेको छ ।
तर, एक दशकअघि तयार पारिएको वातावरणीय प्रभाव मूल्यांकन प्रतिवेदन (ईआए) अनुसार गरिएको सम्झौतामा भन्दा बढी रूख काट्नुपर्ने भएपछि महाविद्यालयको काम अघि बढ्न नसकेको हो । चित्रपानी सामुदायिक वनअन्तर्गत साढे २६ बिघा जमिनमा ६ सय ५० वटा रूख काट्नुपर्ने सम्झौतामा उल्लेख छ । तर, अहिले रूखको संख्या बढेर उक्त क्षेत्रमा दुई हजार तीन सय ५१ वटा रूख कटान गर्नुपर्ने भएको जिल्ला वन अधिकृत प्रल्हाद धितालले बताए । ‘सम्झौतामा उल्लेख भएभन्दा धेरै रूख कटान गर्नुपर्ने भएपछि थप प्रक्रिया अघि बढाइरहेका छौं’, उनले भने । ती रूख पनि कात्तिक १ गतेपछि मात्र काट्न पाइने कानुनी प्रावधान छ ।
प्रदेश ३ का मुख्यमन्त्री डोरमणि पौडेल तथा मुख्यमन्त्री कार्यालयको पहलमा शनिबार हेटौंडामा भएको दुईपक्षीय छलफलमा कात्तिकबाट रूख कटानसँगै निर्माण अघि बढाउने सहमति भएको छ । छलफलमा नेपालस्थित भारतीय दूतावासका अधिकारीसँग नेपाली पक्षले कात्तिकअघि नै वातावरणीय व्यवस्थापन योजना बनाएर रूख कटानको सबै प्रक्रिया पूरा गरिसक्ने प्रतिबद्धता जनाएको छ । त्यसका लागि सीटीईभीटीले वातावरणीय व्यवस्थापन योजना वन मन्त्रालयबाट स्वीकृति गराई जिल्ला वनसँगको सहकार्यमा रूख कटानको काम गर्ने सीटीईभीटीका पोलिटेक्निक महाशाखा प्रमुख विनय मि श्रले बताए ।
बैठकमा भारतीय पक्षले रूख कटान र निर्माण कार्यस्थलवरिपरि पर्खाल नहुँदा सुरक्षाका कारण काम गर्न समस्या भएको बताएका थिए।
‘कात्तिक १ गतेबाट रूख कटान सुरु गर्ने र सँगै निर्माण पनि अघि बढाउने गरी आन्तरिक तयारी अघि बढाएका छौं’, नेपाल-भारत मैत्री बहुप्राविधिक शिक्षालय प्रमुख महेश्वर रञ्जितकारले भने । महाविद्यालयमा अध्ययन गर्ने भवन, छात्रावास, खेलकुद मैदान, व्यावसायिक तालिम भवनलगायत संंरचना निर्माण हुनेछन् । उनका अनुसार पहिलो चरणमा उक्त विद्यालयमा डिप्लोमा तहको कम्प्युटर अर्थात् आईटी, मेकानिकल र इलेक्ट्रिक विषयको पढाइ हुनेछ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)