वीपी प्रतिष्ठानको अनियमितताको छानविन सुरु
धरान : सुनसरीको धरानस्थित वीपी कोइराला स्वास्थ्य विज्ञान प्रतिष्ठानमा भएको अनियमितिताको छानविन सुरु भएको छ । सरकारले गठन गरेको छानविन समितिले बिहीबारदेखि प्रतिष्ठानका कागजपत्र नियन्त्रणमा लिएर छानविन सुरु गरेको हो ।
प्रतिष्ठानका पूर्व उपकुलपती बलभद्रप्रसाद दास, रजिष्ट्रार तुलबहादुर श्रेष्ठ र हालका उपकुलपती राजकुमार रौनियारका पालामा भएका अनियमितताको छानविन गरी दोषिउपर कारवाहीका लागि सरकारलाई सिफारिस गर्ने खतिवडाले बताए । पूर्व उपकुलपती दासका पालामा मातृ शिशु स्याहार केन्द्र भवनको ठेक्का, मेडिकल उपकरणहरु खरिद र सवारी साधनहरुको खरिदमा समेत मूल्य दरभन्दा बढी देखाएर भुक्तानी दिएको उजुरी परेपछि सरकारले छानविन समिति गठन गरेको हो ।
हालका उपकुलपति रौनियारको पालामा समेत मेडिकल उपकरण खरिदमा समेत अनियमितता गरेको उजुरी परेपछि २०७२ सालदेखि यता भएका सबै आर्थिक कारोवारहरुको फाइल नियन्त्रणमा लिएर टोलीले छानविन थालेको छ । छानविन समितिले प्रतिष्ठानका उपकुलपति रौनियार, रजिष्ट्रार तुलबहादुर श्रेष्ठ, सहायक रजिष्ट्रार अमित श्रीवास्तव लगायतका कर्मचारीहरुको बयान समेत लिएको छ ।
छानविन समितिमा स्वास्थ्य मन्त्रालयका सहसचिव तारानाथ पौडेल, उपसचिव भवनाथ खतिवडा, भौतिक पूर्वधार तथा यातायात मन्त्रालयका सहसचिव प्रमिलादेवी बर्जचार्य लगायतले प्रतिष्ठानमा भएको अनियमितताको छानविन गरिरहेका छन् । सरकारले छानविन समितिलाई छानविन अवधिभर धरानमा नबस्न निर्देशन दिएको बुझिएको छ । छानविन टोली इटहरीको पाथिभरा होटलमा बसेर प्रतिष्ठानको छानविन गरिरहेको छ ।
प्रतिष्ठानका उपकुलपति राजकुमार रौनियारले प्रतिष्ठानमा आफूले नेतृत्व सम्हालेपपछि आर्थिक अनियमिततालाई नियन्त्रण गरेको दावी गर्दे छानविन समितलाई छानविन गर्न पूर्णरुपमा सहयोग गरिरहेको बताएका छन् ।