काठमाडौं : गृह मन्त्रालयले पूर्वी टिमोरको नक्कली राहदानीमा बोस्निया हर्जगोभिना हुँदै युरोप छिर्न खोज्ने ९ इरिट्रियालीलाई एक वर्ष नेपाल प्रवेशमा प्रतिबन्ध लगाइ निष्काशन गरेको छ । गत असार १८ गते त्रिवि अध्यागमन कार्यालयबाट पूर्वी टिमोरको नक्कली राहदानीमा प्रस्थान अनुमति लिएका नौ इरिट्रियालीलाई बोस्निया हर्जगोभिनाले फिर्ता (डिपोर्ट) गरेपछि उनीहरू पक्राउ परेका थिए । अध्यागमन विभागले नौ इरिट्रियालीलाई नक्कली राहदानीमा शंकास्पद यात्रा गरेको भन्दै एक वर्ष नेपाल आउन प्रतिबन्ध लगाएर निष्काशन गर्ने निर्णय गरेको हो ।
अध्यागमन विभागको हिरासतमा रहेका नौ इरिट्रियालीलाई फर्काउन उनीहरूका आफन्तसमेत काठमाडौं आइपुगेका छन् । अध्यागमन विभाग मुद्दा शाखाका अधिकृत चिरञ्जीवी थापाले नौ इरिट्रियालीलाई निष्काशन गर्ने निर्णय भइसकेको र टिकटको व्यवस्था हुने वित्तिकै उनीहरूलाई फिर्ता पठाइने बताए ।
थापाले अन्नपूर्णसँग भने, ‘इरिट्रियाको राहदानी समेत उनीहरूका आफन्तले ल्याइदिएका छन् । निर्णय भइसकेको छ, अब प्रक्रिया पु¥याएर पठाउँछौं ।’ उनीहरू काठमाडांैमा पक्राउ परेको थाहा पाएपछि अफ्रिकी मुुलुक इरिट्रियाबाट उनीहरूका आफन्त नेपाल आएका थिए । तीनका आफन्तले उनीहरूलाई फिर्ता लैजान टिकट मिलाउँदैछन् ।
त्रिभुवन अन्तर्राष्ट्रिय विमानस्थलस्थित अध्यागमन कर्मचारीले असार ६ गते पूर्वी टिमोरको नक्कली राहदानीमा आएका नौजना इरिट्रियालीलाई आगमन (अराइभल) अनुमति दिएका थिए । असार १८ गते त्यही नक्कली राहदानीमा प्रस्थान अनुमति लिएका उनीहरूलाई बोस्निया हर्जगोभिनाले असार २१ मा नेपाल फिर्ता पठाएको थियो । इरिट्रियाका नागरिक जोन हेवेटाको संयोजनमा उनीहरू नक्कली राहदानीमा नेपाल प्रवेश गरेका थिए ।
त्रिवि अध्यागमनका कर्मचारीले नौ इरिट्रयालीसँग भएको पूर्वी टिमोरको नक्कली राहदानीमा आगमन र प्रस्थान अनुमति दिएका थिए । हेवेटा नेपाल आए पनि बोस्निया हर्जगोभिना गएनन् । कतारमा बसेर हेबेटाले उनीहरूलाई बोस्निया हर्जगोभिना पठाउने प्रयत्नमा थिए । । हेवेटाको सेटिङमा नेपाल हुँदै बोस्निया हर्जगोभिना छिर्ने र त्यहाँबाट अनुकूलता अनुसार युरोपेली देश जाने उनीहरूको तयारी थियो ।
पूर्वी टिमोरका राहदानी वहाकले बोस्निया हर्जगोभिनामा अन अराइभल भिसा पाउँछन् । इरिट्रियाका नागरिकहरुले भने बोस्निया हर्जगोभिना जान अग्रिम भिसा लिनु पर्दछ ।
त्रिवि अध्यागमनमा पासपोर्ट रिडेबल मेसिन (पीआरएम) र यूवी लाइट भए पनि ती प्रभावकारी छैनन । अध्यागमन विभागले नक्कली राहदानी वहाक नौ इरिट्रियाली नागरिकलाई निष्काशन गर्ने निर्णय गरे पनि उनीहरूलाई प्रस्थान र आगमन अनुमति दिने कर्मचारीमाथि सामान्य सोधपुछ समेत गरेको छैन ।
प्रतिक्रिया दिनुहोस !
