घट्यो अदालतमा मुद्दामामिला
फुङलिङ : ताप्लेजुङ जिल्ला अदालतमा मुद्दाको संख्या घटेको छ । पछिल्ला तीन वर्षमा अदालतमा मुद्दा आउन कम भएको जिल्ला न्यायाधीश कृपासुर कार्कीको भनाइ छ ।
आर्थिक वर्ष २०७४/७५ मा अदालतले ५ सय ५२ मुद्दा संख्या पुग्ने अनुमान गरेकोमा ४ सय मात्र दर्ता भए । ३ सय २२ वटा मुद्दा फछ्र्योट भएको अदालतले जनाएको छ । अघिल्लो आवमा अदालतमा ४ सय ६० वटा मुद्दा आएकामा ३ सय ११ (६७ प्रतिशत) फैसला भएको थियो । गत वर्ष भने अदालतले ८० प्रतिशत फछ्र्योट गरेको छ । आव २०७२/७३ मा ५ सय ७२ मुद्दा दर्ता भई ७२ प्रतिशत फैसला भएको देखिएको छ ।
नागरिक सचेत बन्दै गएको र स्थानीय तहका न्यायिक समितिले मुद्दा हेर्न थालेपछि घटेको हुन सक्ने जिल्ला न्यायाधीश कार्कीको ठम्याइ छ । स्थानीय निर्वाचनपछि उपप्रमुखको संयोजकत्वमा न्यायिक समिति गत वर्षदेखि मात्र गठन भए पनि मुद्दा भने तीन वर्षयता नै घटेका हुन् । गत वर्षदेखि जिम्मेवारी सरी आएका मुद्दा सातवटा रहेको अदालतले जनाएको छ । १८ महिना नाघेका मुद्दा दुईवटा रहेको जनाइएको छ ।
उनका अनुसार गत वर्ष देवानीभन्दा फौजदारी अपराधका मुद्दा बढी आएका थिए । १ सय ९८ फौजदारी र १ सय ९५ देवानी मुद्दा दर्ता भएको जनाइएको छ । घरेलु हतियार र मदिराका कारण समस्या बढेको बताइएको छ ।
सबैभन्दा बढी ज्यान मार्ने उद्योग, त्यसपछि कुटपिट, लुटपाटका मुद्दा बढी आउने गरेको उनले सुनाए । गत वर्ष चुनावको समय भएकाले राजनीतिक दलका कार्यकर्ताको विवादका मुद्दा पनि आएकाले संख्या बढेको हो ।
अदालतले अभियुक्तलाई ९५ लाख ११ हजार जरिवाना तोकेकोमा ८३ लाख ८८ हजार उठ्न बाँकी छ । कैद सजाय पनि २० प्रतिशत मात्र भुक्तान भएको पाइएको छ । १ हजार ५ सय २३ वर्ष कैद तोकिएकामा १ हजार २ सय ८८ वर्ष अझै भुक्तान गर्न बाँकी रहेको अदालतले जनाएको छ ।
७८ प्रतिशत मुद्दा फछ्र्योट
भोजपुर ः जिल्ला अदालत भोजपुरले आर्थिक वर्ष २०७४÷७५ मा ७८.७ प्रतिशत मुद्दाको टुंगो लगाएको छ । गत आवमा २ सय ६५ मुद्दामध्ये अदालतले २ सय ७ वटाको फैसला गरेको हो । अदालतले आव २०७३÷७४ को ६१ र गत आवको २ सय ४ गरी २ सय ६५ मध्ये अदालतले अन्तिम नौ महिनाका ५८ वटा मुद्दा चालू आवमा सारेको छ । जिल्ला न्यायाधीश हरिशचन्द्र इङ्नामका अनुसार फछ्र्योट गर्न बाँकी मुद्दामध्ये ३० वटा ०७५ वैशाखमा आएको र म्याद थप्ने, मुद्दाको रोकथामलगायत प्रक्रिया पूरा गर्न समय लाग्ने भएकाले तत्काल टुंगो लगाउन नसकिएको हो । सम्बन्धविच्छेदका ५८ मुद्दामा ४५ वटा फछ्र्योट भएको जनाइएको छ । २५ देखि ४० वर्ष उमेर समूहका दम्पती सम्बन्धविच्छेदको मुद्दा लिएर आउने गरेको जनाइएको छ ।