काठमाडौं : प्रदेश ३ का यातायात कार्यालयले आर्थिक वर्ष २०७४/०७५ मा १२ अर्बभन्दा बढी राजस्व संकलन गरेका छन् । यातायात विभाग अन्तर्गतका कार्यालयले सवारीसाधन कर, सडक सम्भार तथा मर्मत शुल्क, चालक अनुमतिपत्र तथा सवारी इजाजत दस्तुर, इम्बोस्ड नम्बर जडान शुल्क, दण्ड जरिवाना र यातायात क्षेत्रको आम्दानी शीर्षकमा राजस्व संकलन गरिरहेका छन् ।
सोही अनुरुप विभागले सबैभन्दा बढी राजस्व प्रदेश ३ बाट संकलन गरेको छ । विभागको तथ्यांकअनुसार गत आवमा प्रदेश ३ बाट मात्रै १२ अर्ब १३ करोड ८५ लाख ४२ हजारभन्दा बढी राजस्व संकलन भएको छ ।
यो कुल यातायात क्षेत्रको राजस्व संकलन रकमको ५१ प्रतिशतभन्दा बढी हो । गत आव विभागले देशभरबाट २३ अर्ब ६४ करोड ९९ लाख १९ हजार रुपैयाँ राजस्व संकलन गरेको छ ।
प्रदेश ३ मा सवारीसाधन करमार्फत पाँच अर्ब ५१ करोड रुपैयाँभन्दा बढी राजस्व संकलन गरेको छ । यसैगरी विभागले सडक सम्भार तथा मर्मत शुल्क शीर्षकमा पाँच अर्ब ३० करोड, चालक अनुमतिपत्र तथा सवारी इजाजत दस्तुरमार्फत एक अर्ब र इम्बोस्ड नम्बर प्लेट जडानबाट एक करोड ९५ लाख ६८ हजार रुपैयाँभन्दा बढी राजस्व संकलन गरेको छ ।
यसैगरी गत आवमा प्रदेश २ अन्तर्गतका यातायात कार्यालयले चार अर्ब २६ करोड ९३ लाख ३० हजार राजस्व संकलन गरेका छन् ।
प्रदेश २ बढी राजस्व संकलन गर्नेमा दोस्रो नम्बरमा पर्छ । राजस्व संकलनमा प्रदेश २ को हिस्सा १८ प्रतिशत छ ।
गत आवमा प्रदेश २ ले सवारीसाधन करमार्फत एक अर्ब २८ करोड, सडक सम्भार तथा मर्मत, दुई अर्ब ३४ करोड र चालक अनुमतिपत्र तथा सवारी इजाजत शीर्षकमा ५३ करोड ५६ लाख रुपैयाँ राजस्व संकलन गरेको छ ।
यस्तैगरी तेस्रो बढी राजस्व संकलन गर्नेमा प्रदेश ५ छ । प्रदेश ५ ले गत आवमा तीन अर्ब ३० करोडभन्दा बढी राजस्व संकलन गरेको छ । यो कुल राजस्वको संकलनको झन्डै १४ प्रतिशत हो ।
यस्तैगरी चौथौ बढी राजस्व संकलन गर्ने प्रदेश १ परेको छ । प्रदेश १ अन्तर्गतका यातायात कार्यालयले कुल दुई अबै १२ करोड ६७ लाख रुपैयाँ ५१ हजार रुपैयाँ राजस्व संकलन गरेको छ ।
प्रदेश १ ले गत आवमा सावरीसाधन कर शीर्षकमा एक अर्ब १६ करोड, सडक सम्भार तथा ममर्त शुल्कमार्फत ५० करोड ०१ लाख र चालक अनुमतिपत्र तथा सवारी इजाजात शीर्षकमा ३७ करोड ८२ लाख रुपैयाँ राजस्व संकलन गरेको छ । प्रदेश १ ले संकलन गरेको राजस्व रकम कुल राजस्व रकमको करिब १० प्रतिशत हुन आउँछ ।
यसैगरी गत आवमा प्रदेश ४ अन्तर्गतका यातायात कार्यालयले एक अर्ब २० करोड ५२ लाख रुपैयाँ राजस्व संकलन गरेको थियो ।
यसैगरी प्रदेश ७ ले ५१ करोड ७४ लाख ६० हजार रुपैयाँभन्दा बढी राजस्व संकलन गरेको छ भने प्रदेश ६ ले सबैभन्दा धेरै नौ करोड २१ लाख ८७ हजार रुपैयाँ मात्रै राजस्व संकलन गरेको विभागले जनाएको छ ।
कुन शीर्षकमा कति राजस्व
यातायात कार्यालयले सबैभन्दा बढी सवारीसाधन कर शीर्षकमा राजस्व संकलन गरेका छन् । विभागमा अनुसार यो शीर्षकमा मात्रै १० अर्ब ६५ करोड, ७६ लाख ९९ हजार रुपैयाँ राजस्व संकलन भएको छ ।
यसैगरी सडक सम्भार तथा मर्मत दस्तुरमार्फत नौ अर्ब ४३ करोड ३६ लाख ९० हजार रुपैयाँ संकलन भएको विभागले जनाएको छ । सवारी चालक अनुमतिपत्र तथा सवारी इजाजत दस्तुर शीर्षकमा दुई अर्ब ८४ करोड ७० लाख रुपैयाँ र इम्बोस्ड नम्बर प्लेट जडानमार्फत एक करोड ९५ लाख राजस्व संकलन भएको छ ।
यस्तैगरी विभागले यातायात क्षेत्रको आम्दानी शीर्षकमा ६८ करोड ६० र प्रशासनिक दण्ड जरिवानमार्फत ५४ लाख ६५ हजार रुपैयाँ संकलन गरेको जनाएको छ ।
सवारी राजस्व विवरण
प्रदेश संकलित रकम (रुपैयाँ)
१ २,१२६,७५१,२७७
२ ४,२६९,३३०,२६६
३ १२,१३८,५४२,५६१
४ १,२०५,२०३,४६१
५ ३,३००,४४४,१५३
६ ९२,१८७,०४०
७ ५१७,४६०,५९०
जम्मा २३,६४९,९१९,३४७
स्रोतः यातायात व्यवस्था विभाग
प्रतिक्रिया दिनुहोस !
