भोजपुर : भोजपुरको रामप्रसाद राई गाउँपालिका–१ ओख्रेका विष्णु तिम्सिना टाइफाइडले सिकिस्त भएकी ६३ वर्षीया आमालाई स्ट्रेचरमा बोकाएर आइतबार जिल्ला अस्पताल आइपुगे । तर, आकस्मिक कक्ष भरिभराउ थियो । डाक्टरले विष्णुकी आमालाई एकछेउ भुइँमै राखेर सलाइन चढाएर परीक्षण थाले ।
वर्षातसँगै जिल्ला अस्पताल भोजपुरमा मौसमी बिरामीको चाप बढेको छ । दूषित खानेपानीका कारण अस्पतालमा ज्वरो, रुघाखोकी, झाडापखाला, टाइफाइड, निमोनियालगायत रोगका बिरामी बढेपछि भुइँमै राखेर उपचार गर्नुपरिरहेको हो । दैनिक ४० देखि ६० बिरामी जिल्ला अस्पतालमा भर्ना हुन आउने गरेका छन् । अधिकांश बिरामीमा रुघाखोकी, ज्वरो, झाडापखाला, टाइफाइड, दम तथा निमोनियाको लक्षण देखिने गरेको जिल्ला स्वास्थ्य प्रमुख डा. नवलकिशोर झाले जानकारी दिए । उनका अनुसार मौसम परिवर्तनको समयसँगै फोहोर खानेपानीका कारण मौसमी बिरामीको चाप बढेको हो ।
बिरामीको चाप बढेपछि १५ शड्ढया रहेको अस्पतालमा ३५ शड्ढया थपेर उपचार भइरहेको छ । बिरामीलाई भुइँमै बक्सबेड (कुरुवाका लागि राखिएको खाट)मा राखेर उपचार गर्नुपरिरहेको डा. शिवजी रिजालले बताए । ‘अस्पतालको भवन निर्माण भइरहेको छ’, उनले भने, ‘यसकारण पनि साँघुरो बनेको बिरामी कक्षमा तत्कालका लागि भुइँमै राखेर बिरामीको उपचार गर्नुपर्ने बाध्यता छ ।’ ओपीडीमा दैनिक ९० को हाराहारीमा स्वास्थ्य परीक्षण र उपचारका लागि बिरामी आउने गरेको अस्पतालले जनाएको छ ।
प्रतिक्रिया दिनुहोस !
